Зоран Милановиќ не може да биде кандидат на изборите, одлучи Уставниот суд

Уставниот суд на Хрватска денеска одлучи дека претседателот на државата, Зоран Милановиќ, не може да биде кандидат на пратеничките листи за изборите закажани на 17 април. Тоа е неспоиво со неговата функција.

Претседателот на Уставниот суд Мирослав Шепаровиќ и се обрати на јавноста по средбата која траеше повеќе од два часа.

„Врз основа на член 125, Уставниот суд дава предупредување врз основа на изјавата на Милановиќ дека ќе се кандидира за пратенички мандат.

Уставниот суд ја разгледа неговата изјава, должни сме да предупредиме дека одлуките треба да се усогласат со темелните вредности на Хрватска. Во членот 96 е определено дека не може да врши друга должност и поднесува оставка. Претседателот е непартиска личност и не може да учествува во активностите на ниту една политичка партија. Не смее да биде на листата ниту кандидат. Тие што ги носат овие одлуки се одговорни, секое такво постапување е спротивно на Уставот.

Кандидатурата на претседателот на листата на која било политичка партија за избор и неговото претставување како кандидат се некомпатибилни со неговата уставна положба и принципот на поделба на власта. Доколку врз основа на неговите изјави за време на неговиот мандат се кандидира за функцијата, мора веднаш да поднесе оставка“, рече Шепаровиќ.

„Целиот изборен процес ќе биде под строг надзор на Уставниот суд, доколку се утврди дека се постапува спротивно на законот, ќе ја информираме јавноста или ќе ја поништиме кандидатурата. Веднаш нека престанат со активностите што се спротивни на Уставот“, нагласи Шепаровиќ и на крајот објасни дека девет судии гласале за оваа одлука, а двајца судии биле против.

„Мислам дека предупредувањето на Уставниот суд е повеќе од јасно. Се надевам дека нема да дојдеме во ситуација да се поништат изборите и да се поништат кандидатските листи како и резултатите од парламентарните избори. Она што Милановиќ не смее да го направи е тоа што го направи од петокот до синоќа. Границата е дека тој не смее да учествува во политички кампањи, да не биде кандидат за пратеник и да не се појавува како потенцијален кандидат за премиер, ниту да учествува на кој било начин во политичка игра.

Политичката опција која ќе победи може да му даде мандат, се што е во согласност со Уставот може да направи претседателот на Република Хрватска. Претседателот на Република Хрватска со своите постапки во петокот, саботата и неделата го прекрши Уставот. За да биде сменет од функцијата, Собранието треба да го предложи со 2/3 мнозинство, а Собранието да го усвои со 2/3 мнозинство. Се надевам дека Милановиќ и СДП ќе се придржуваат до Уставот и ова предупредување“, рече претседателот на Уставниот суд.