Литванија е подготвена да испрати војници во Украина

Брисел – Претседателот на Литванија, Гитанас Науседа изјави денеска дека неговата земја е подготвена да испрати свои војници во Украина, како дел од мисијата која би дејствувала по примирјето.

„Мојата земја е подготвена да ја даде потребната поддршка. Зборувам за многу конкретни бројки на војници. Сепак, треба да има посветеност од сите земји во оваа коалиција да обезбедат таква поддршка“, рече Науседа во интервју за Блумберг за време на неговиот престој во Брисел.

Науседа изјави и дека верува оти претседателот на Соединетите Американски Држави, Доналд Трамп, има искрени намери да стави крај на војната во Украина, додека претседателот на Русија, Владимир Путин, како што истакна, го злоупотребува тој процес.