„Крсте Мисирков“ за животно дело за Ѕвездан Георгиевски

 Здружението на новинарите на Македонија (ЗНМ) денеска ги додели годишните награди за 2024 во четири категории. Ѕвездан Георгиевски е добитник на наградата за животно дело „Крсте Петков Мисирков“ како признание за неговиот траен придонес во македонското новинарство.

Герман Филков од жири-комисијата информира дека годинава пристигнале 48 пријави со 99 новинарски производи: текстови и видое стории и цели емисии, а првпат беа доделени и награди за снимателски проект.

Филков како што појасни во образложението за доделување на наградата за животно дело „Крсте Петков Мисирков“ на новинарот и колумнист Ѕвездан Георгиевски, предлагачите на наградата направиле мајсторско нешто објаснувајќи ги карактеристиките на Ѕвездан, а тоа се професионализмот, стилистиката, интегритетот, активизмот и влијанието бидејќи, како што рече, скоро 50 години Ѕвездан се обидува да ги разгатне сложените општествени  феномени на распадот на една и формирањето на друга општествена  заедница, непогрешливо филтрирајќи го битното од небитното, кои   некои често   се обидуваат тоа да ни наметнат. Потсети дека Ѕвездан Георгиевски почнува од   „Млад борец“ преку „Екран“, „Нова Македонија“, „Вечер“, Радио Скопје до „Пулс“, „Утрински весник“, уредник е на култниот „ЛИК“, автор на колумната Препознавања, коосновач на Радио Канал 4, извршен директор на Фондацијата „Славко Јаневски“ која го доделува „Романот на годината“, иницијатор на „Коза ностра“, автор на книги и есеи и коосновач и в.д. претседател на самостојниот  Синдикат на новинарите на Македонија.

-Ѕвездан  е еден од нејпрепознатливите и најдолготрајните колумнисти во земјава и се уште активен и го освежува и постојано ја поттикнува јавната свест  за сите општествени  појави, потенцира Филков.

Примајќи ја наградата, новинарот Георгиевски потсети дека последната награда ја добил пред три децении и додаде дека е многу радосен што ја прима оваа награда за животно дело.  Им се заблагодари на предлагачите и колегите кои ја препознале неговата работа, а при тоа се потсети на своите први интервјуа од студентските денови.

За најдобро новинарско известување на локални и регионални теми, наградата ја доби Фисник Џелили од Порталб.мк за сторијата „Насилството меѓу учениците – сериозен аларм во Тетово “.

Како што беше појаснето во образложението од жири-комисијата, сторијата на новинарот Џемаили расветлува еден од  најсериозните проблеми во нашето општество, проблемот кој последните години е присутен и во Тетово – насилството меѓу учениците. Сторијата информира за еден шокантен настан кој се случи  на 29 март лани, каде среде училиште неколку основци фрлаат во воздух еден нивни соученик, кој при падот тешко се повредува. Сторијата ги истражува корените на проблемот и посочува што требало,а што не е направено за спречување на училишното насилство. Таа посочува  на недостатоците во образовниот систем и на молкот на институциите. Сторијата поттикнала јавна дебата за најитните и најчуствителните проблеми во општеството, односно во локалните средини.

Наградениот Џелили се заблагодари на жирито за наградата  и потенцира дека оваа награда за него е многу важна, како и за редакцијата и се заблагодари на сите колеги и институции кои му помогнале за оваа сторија.

Признанија за посебен придонес во промоцијата на професионалното истражувачко новинарство добија: Новинарскиот истражувачки магазин КОД од ТВ Телма за сторијата: „Тендерите во лотарија за набавка на видеотерминали и милионите евра“, Александар Димитриевски и Михаил Милошевски за серијата на прилози на тема: Бојан Христовски, поседува сертификат за познавање на англиски јазик од студио/училиште кој датира од период во кој издавачот на сертификатот ниту остварувал приходи (не работел), ниту пак бил на листата правни субјекти објавено на 360 степени.

Новинарите на КОД, како што се наведува, разоткриле сложена мрежа на сомнително он-лајн коцкање во земјава. Прилозите и емисиите на оваа тема разоткриле дека државните инстуитуции наместо  да го спроведуваат законот овозможувале законски сомнително интернет обложување повеќе од седум години.Со документи, докази и факти се отворија клучни прашања за транспарентноста, одговорноста и влијанието на крупните интереси во оваа дејност. Филков потенцира дека признанието е охрабрување за колегите да продолжат понатаму се до крајно решавање на овој случај, преземање на потребните мерки и заштита на јавниот интерес и парите.

Како што појасни Филков, Димитриевски и Милошевски ја разоткриле мрежата на добивање сомнителни сертификати за познавање  на странски јазик што е законски  предуслов за стекнување клучни државни функции. Овие истражувачки стории, како што рече, не само што понудија непобиен материјал и докази за секоја од надлежните институции што сака да постапува по случајот, воедно преку овој пример  и за една толку важна државна функција за првиот човек на Националната безбедност се покренаа и значајни прашања воопшто за кредибилитетот на луѓето кои управуваат со нашите институции. Филков  потенцира дека оваа истражување поттикнало предистражна постапка и повеќе од тоа, покажале дека улогата на истражувачкото новинарство е многу важна.

Првпат беше доделена награда за снимателски проект за 2024 на Иван Поповиќ за документарниот филм снимен во еден ден „Климатски мигарции: Преспа во трка со времето да ја зачува водата“, со цел да се алармираат надлежните за климатските промени врз езерото.

Трајче Антоновски, снимател од ИРЛ, е награден за најдобра камера и филмско изразување за сторијата на тема: Украдени животи.

Младен Чадиковски од ЗНМ оцени дека и покрај големите предизвици и проблеми,  сепак,  македонското новинарство има новинари,  има и подмладок и иднина, а доказ за тоа се многуте пријавени успешни истражувачки стории во 2024 година.