Крива Река затруена со олово, арсен и цијанид од „Тораница“
По инцидентот што се случи на 14 март, инспектор за животна средина на рудникот „Тораница“ направил увид на денот на хаваријата и констатирал дека има само заматување, односно механичко онечистување. Но, поради бурните реакции и загриженоста на населението, од страна на градоначалникот на Крива Паланка, Сашко Митовски, била ангажирана приватна и независна лабораторија за земање мостри од Крива Река која констатирала излевање на опасна течност во водите на реката со алармантно присуство на тешки метали: олово, арсен, цијанид… што се директна закана по здравјето на граѓаните, долготрајни последици и штети по земјоделските поседи, земјоделски и овошни култури во општините Крива Паланка и Ранковце.
Општина Крива Паланка за утре свика вонредна прес-конференција за медиумите на која ќе признае дека истекол цијанид во Крива Река од рудникот „Тораница-булмак“. Долготрајни последици се очекува да има и по посевите на соседната општина Ранковце.
Еко-активистите подолго време вршеа притисок врз локалните власт тоа да го признаат откако на 14 март пукна цевка од флотацискиот дел на еден од најголемите рудници во земјата за олово и цинк и се излеа опасна течност. Алармот се вклучи откако реката доби заматување и сива боја.
„Ве покануваме на прес-конференција на градоначалникот на Општина Крива Паланка, Сашко Митовски по повод хаваријата т.е.инцидентот со излевање на опасна течност од рудникот “Тоарница-Булмак“ во водите на Крива Река, што се случи на 14 март и што предизвика големо заматување и загадување на водата, како и презентација на пристигнатите анализи од мострите земени од водите на Крива Река“, соопштија од таму.
Пукната цевка од флотацискиот дел на рудникот „Тораница-Булмак“ и се излеала опасна течност која завршила во водите на Крива Река. За еколошкиот инцидент алармираа еко-активисти откако забележале дека реката е заматена и добила сива боја, па вршеле притисок врз општина Крива Паланка во јавноста да се објави за еколошкиот инцидент. Тие реагираат дека по инцидентот, инспектор за животна средина на рудникот направил увид на денот на хаваријата и констатирал дека има само заматување, односно механичко онечистување.
– На ден 14.3.2025 година (петок) во рудникот „Тораница“ се случи инцидент на истекување на технолошка вода која се користи во процесот на флотација на олово-цинкова руда. Инцидентот се случил во периодот од 6:30 до 7:00 часот, поради пукање на цевка преку која се доведува технолошка вода од таложникот за јамски води до погонот за флотација. Оваа вода не содржи хемиски средства, бидејќи е истечена пред да дојде во погонот на флотација. Содржи само механички онечиститувања, односно водата е заматена. Во меѓувреме дефектот се санира и е сопрено истекувањето на водата – се наведува во извештајот од увидот на инспекторот за животна средина на рудникот, кој го доставил до Државниот инспекторат за животна средина – пишува „Вечер“.
Но, поради бурните реакции и загриженоста на населението, од страна на градоначалникот на Крива Паланка, Сашко Митовски, била ангажирана приватна и независна лабораторија за земање мостри од Крива Река, со цел, како што велат „да ги докажеме штетите и последиците од големата хаварија“.