Коалициските партнери на СДСМ го поддржаа Пендаровски

Коалициските партнери на СДСМ ја поддржуваат кандидатурата на Стево Пендаровски за претседател на државата.

„На денешниот работен состанок на највисоките претставници на партиите од коалицијата предводена од СДСМ беше јасно изразена поддршката за неговата кандидатура и заеднички беше оценето дека Пендаровски е победнички кандидат со јасна европска визија за иднината на државата“, стои во соопштението на СДСМ.

Заедничката согласност за поддршка на кандидатурата на Пендаровски партиите од коалицијата се очекува да ја потврдат и на своите органи и партиски тела.

„Во досегашниот мандат Пендаровски покажа што значи да се биде вистински претседател за сите граѓани. Со негова одговорност и независност го врати угледот, интегритетот и кредибилитетот на институцијата претседател на државата.

Зад себе Пендаровски има мандат без ниту една стратешка грешка, без ниту една корупциска афера или случај на судир на интереси.

Пендаровски е претставник на сите наши граѓани без разлика на етничка, политичка, верска или каква било припадност.

На претстојните избори, изборот пред граѓаните е продолжување на напредокот кон ЕУ или изолација. На граѓаните и на државата не им треба претседател кој ќе кочи, туку претседател, како Пендаровски кој ќе турка напред по вистинскиот пат, кон европски животен стандард и европски вредности“, велат партиите од коалицијата.