Кина го вклучува олеснувањето на извозот на чипови за вештачка интелигенција од САД како услов за склучување трговски договор со Вашингтон

Лондон – Кинеските претставници вршат притисок врз САД да ги ублажат контролите за извоз на чипови што се критични за вештачката интелигенција како дел од трговскиот договор пред евентуалниот самит меѓу претседателите Доналд Трамп и Си Џинпинг, објави „Фајненшл тајмс“, повикувајќи се на луѓе запознаени со ова прашање.
Кинеските претставници им кажаа на експертите во Вашингтон дека Пекинг сака администрацијата на Трамп да ги ублажи ограничувањата за извоз на такви чипови (HBM), објави весникот, повикувајќи се на неименувани луѓе запознаени со ова прашање.

Белата куќа, Стејт департментот и Министерството за надворешни работи на Кина не одговорија веднаш на барањата за коментар за извештајот.

HBM чиповите, што помагаат да се забрзаат задачите за обработка на податоци со висок капацитет поврзани со вештачката интелигенција, внимателно се следат од инвеститорите поради нивната употреба во графичките процесори за вештачка интелигенција, особено оние од „Нвидија“. Кина е загрижена дека контролите на САД врз меморијата со високи перформанси ја попречуваат способноста на кинеските компании како „Хуавеи“ да развиваат свои чипови за вештачка интелигенција.

Претседателски администрации на САД го ограничија извозот на напредни чипови во Кина, обидувајќи се да го попречат развојот на вештачката интелигенција и одбраната на Пекинг.