Кина ги отфрли обвинувањата на Зеленски за поддршка на Русија

Кина е посветена на ставање крај на украинската криза и ќе продолжи да игра конструктивна улога во промовирањето на политичко решение, нагласи портпаролот на Министерството за надворешни работи, Гуо Џијакун.

Тој на редовен брифинг ги отфрли тврдењата на украинскиот претседател Володимир Зеленски дека Пекинг „ѝ дава поддршка на Русија“ и оти нема редовен дијалог со Киев.

– Кина неуморно се залага за прекин на огнот и ставање крај на непријателствата, залагајќи се за помирување и унапредување на дијалогот, рече Џијакун, додавајќи дека ставот на Пекинг во врска со украинското прашање е заснован на „принципите на правичност и објективност“.

Според него, Кина дејствува во согласност со својот традиционален пристап кон мирно решавање на конфликтите и соработка меѓу државите.

– Меѓународната заедница е сведок на напорите на Кина, истакна тој.

– Ќе продолжиме да се залагаме за дијалог и мир, играјќи конструктивна улога во намалувањето на тензиите и унапредувањето на политичкото решение на кризата, порача портпаролот на кинеската дипломатија.