Кан е идеален спој на филм и мода: Ова се деталите за црвениот килим

Кан- Црвениот килим во Кан ќе биде жежок, со ѕвездена постава на филмови и големи ѕвезди за годинешниот фестивал.

Кејт Бланшет, Скарлет Јохансон, Тилда Свинтон, Натали Портман и Џени од Блекпинк се само неколку од актерките кои се очекува да се појават на црвениот килим.

Директорот на фестивалот Тиери Фремо и новата претседателка Ајрис Кноблох ја открија официјалната селекција на филмови и серии што ќе бидат во конкуренција за Златната палма, и специјални проекции за време на 76-тото издание на фестивалот, кое ќе се одржи од 16 до 27 мај.

Јохансон и Свинтон глумат во жестоко очекуваниот „Астероид град“ на Вес Андерсон, во кој играат и Марго Роби, Маја Хоук, Хонг Чау и Хоуп Дејвис, заедно со Том Хенкс, Џефри Рајт, Брајан Кренстон, Едвард Нортон, Лиев Шрибер, Мет Дилон и Стив Карел. 

Шанел најверојатно ќе има силно присуство на светската премиера на „Идол“, со две лица од куќата кои се очекува да се појават на црвениот килим.

И Џени од Блекпинк и Лили Роуз Деп глумат во серијата на Сем Левинсон за поп идол и вознемирувачки гуру за самопомош. Шоуто на HBO, продуцирано и со Абел Тесфаје, попознат како The Weeknd, ќе има премиера надвор од конкуренција.

Бланшет глуми во австралиската драма на Ворвик Торнтон „The New Boy“, чиј продуцент е и таа.

Луј Витон исто така ќе биде присутен, а амбасадорката на брендот Алиша Викандер ќе глуми заедно со Џуд Ло во драмата на Карим Аинуз за Хенри VIII „Firebrand“.

Жилиет Бинош, која присуствуваше на ревијата на  Армани Приве за време на Неделата на високата мода во Париз во јануари, ќе глуми во „Страста на Додин Буфан“, од режисерот Тран Ан Хунг.

Натали Портман, долгогодишно заштитно лице на Диор, и Џулијан Мур глумат во „Мај декември“ на Тод Хејнс, за бракот кој се распаѓа по таблоидната романса. Филмот ќе се натпреварува за Златната палма. 

Мишел Јео ќе биде присутна за време на фестивалот за да ја прими наградата на Керинг за жени во движење, а се очекува и вообичаената парада на забави, вклучително и оние на фестивалскиот спонзор Шопар и Пако Рабан.

Хотелот Карлтон ќе биде домаќин на воведниот вечерен бал по тригодишното обновување, објави Кноблох. „Оваа легенда на градот Кан…го поддржува фестивалот од неговиот почеток и е место на најпрестижните гости. Се радуваме што можеме повторно да се сретнеме во Карлтон во неговиот сјај“, рече таа.

Кноблох како новоизбран претседател на фестивалот е првата жена во таа улога.

„Ја знаете изреката на Сент Егзипери: „Тајната на успешна двојка е да гледате во иста насока“.

Шведскиот режисер Рубен Остлунд ќе биде претседател на жирито – иако остатокот од неговиот тим сè уште не е објавен. Жирито често е преполно со фаворити на црвениот килим кои се појавуваат секоја вечер во модни креации. (WWD)