Институт за проучување на војната: Украина има ограничен број ПВО системи „Патриот“

Комбинираните руски напади ја принудуваат Украина да донесе тешки одлуки кои области да ги заштити со својот ограничен број системи за воздушна одбрана „Патриот“, соопшти Институт за проучување на војната (ISW).

Аналитичарите истакнуваат дека ноќта помеѓу 31 мај и 1 јуни руската армија презела најголем комбиниран напад досега со беспилотни летала и ракети.

Според украинското военовоздухопловство, Русите лансирале три балистички ракети „Искандер-М/КН-23“, четири крстосувачки ракети „Кх-101“ и „Искандер-К“ од воздух и од копно, како и 472 беспилотни летала „Шахед“.

Украина пресретнала три ракети „Кх-101“ и „Искандер-К“ и неутрализирала 213 беспилотни летала, додека уште 172 дронови биле „изгубени“.

Институтот за проучување на војната наведува дека украинската армија не успеала да собори ниту една од трите балистички ракети лансирани од Русија. Аналитичарите истакнуваат дека тоа се должи на ограничениот број системи за воздушна одбрана „Патриот“ произведени во САД.