И рускиот амбасадор во САД се заканува со високи цени на енергенсите

Рускиот амбасадор во Соединетите Држави возврати на воведувањето на санкциите наметнати од американскиот претседател Џо Бајден, сугерирајќи дека овој потег ќе им наштети на глобалните финансиски и енергетски пазари, како и на обичните граѓани.

Според објавата на страницата на Фејсбук на руската амбасада рано во средата, амбасадорот Анатолиј Антонов рече:

„Санкциите нема да решат ништо во однос на Русија. Тешко е да се замисли дека некој во Вашингтон смета на Русија да го преиспита нејзиниот надворешнополитички курс под закана од ограничувања.

Не се сеќавам на ниту еден ден кога нашата земја живееше без никакви ограничувања од западниот свет. Научивме како да работиме во такви услови. И не само да опстанеме, туку и да ја развиваме нашата држава.

Несомнено е дека санкциите воведени против нас ќе им наштетат на светските финансиски и енергетски пазари.

Соединетите држави нема да бидат изоставени, каде обичните граѓани ќе ги почувствуваат целосните последици од растот на цените“.