И Радев влезе во периметарот на Трамп: Бара ЕУ да ги поддржи САД за Украина

Би било правилно Европа да ги поддржи напорите на САД за изнаоѓање невоено решение, изјави бугарскиот претседател Румен Радев.

Како што пренесуваат бугарските медиуми, тој уште еднаш ги критикуваше европските лидери и претходната американска администрација дека ја принудиле Украина да започне контраофанзива против Русија без никакви услови за успех, што доведе до „целосна катастрофа“.

Според објаснувањата на Радев, американскиот претседател сега бара невоено решение за војната, додека Европската унија инсистира на продолжување на воената акција.

„САД инсистираат на брзо решавање на овој конфликт преку дипломатија. Она што го видовме вчера и со посетата на европските лидери на Украина е другиот пристап – продолжување на воените дејствија и барање преку нив да се доведе Украина во позиција на сила за можни понатамошни преговори“.

Во текот на изминатите три години Радев беше еден од ретките европски лидери кои изразија проруски позиции, а сега ги усвои тезите на администрацијата на Трамп, која ја нападна ЕУ и одбива да ја признае Русија како „агресор“. Официјалниот став на владата ја следи европската линија, но лидерот на ГЕРБ, Бојко Борисов, исто така сигнализираше преоценување, споделувајќи ја загриженоста на Трамп дека не се одржуваат избори во Украина.

Радев коментира дека Европа „може да биде ослабена само со сопствени одлуки“.

„Сè започна од оваа контраофанзива. Наместо Украина да се охрабрува да изгради цврсти одбранбени линии, да го зачува одбранбениот потенцијал, таа заврши со уништување. Игнорантски пристап кон тоа како да се спроведе оваа операција“, посочи Радев.

Интересно е што и длабоко проруската националистичка партија Преродба (чии приврзеници пред некој ден ја нападнаа мисијата на ЕУ во Софија) забрзано се престројува во кругот на Трамп. Сѐ поради тоа што американскиот претседател ги затопли односите со рускиот лидер Владимир Путин.