Хронологија на распадот на односот меѓу Трамп и Маск
Се до неодамна, сегашниот американски претседател Доналд Трамп и милијардерот Илон Маск изгледаа како да имаат солиден сојуз – комбинација од најмоќниот политичар и најбогатиот човек во светот.
Но, во последните десет дена, тој однос целосно се распадна, претворајќи се од благо несогласување во отворен конфликт полн со меѓусебни обвинувања, навреди и закани.
Среда, 28 мај
Илон Маск јавно го критикува предложениот закон за даноци и владини трошоци на Трамп во интервју за Си-Би-Ес (CBS), нарекувајќи го „разочарувачки“. Трамп не одговори директно во тоа време, но им рече на новинарите дека „не му се допаѓаат некои аспекти“ од законот, иако е „воодушевен“ од даночните олеснувања.
Четврток, 29 мај
Маск објавува дека ја напушта својата функција како специјален советник за владина ефикасност (DOGE). Му се заблагодарува на Трамп за можноста да „намали отпад“. Трамп веднаш најавува заедничка прес-конференција во Белата куќа и го фали Маск: „Тој е одличен! Ќе биде со нас долго време“.
Петок, 30 мај
За време на збогувањето на Маск од Белата куќа, Трамп вели дека „всушност не заминува“ и дека често ќе се враќа.
Понеделник, 2 јуни
Трамп го брани својот закон за инфраструктура што дополнително ќе го зголеми националниот долг, нарекувајќи ги критиките неточни.
Вторник, 3 јуни
Маск остро одговара на X, нарекувајќи го законот „одвратен и полн со бесмислени трошења“.
Среда, 4 јуни
Маск повикува законот да биде отфрлен и ги повикува граѓаните да контактираат со своите претставници. Тој објавува стари изјави на Трамп од 2012 и 2013 година во кои Трамп го критикува дефицитот, со коментар: „Каде е тој човек денес?“
Четврток, 5 јуни – Целосен колапс
Трамп, во присуство на германскиот канцелар Фридрих Мерц, вели дека не знае дали ќе продолжи да има добри односи со Маск и сугерира дека милијардерот е „вознемирен“ поради елиминацијата на стимулациите за електрични возила.
Маск одговара во реално време, ги отфрла тврдењата на Трамп и повторно го напаѓа законот. Околу пладне, следува серија нови навреди: Трамп вели дека е „разочаран од Маск“, а Маск тврди дека никогаш не го видел законот пред да биде донесен.
Попладнето, Маск објавува дека законот ќе го зголеми дефицитот на 2,5 билиони долари и прашува: „Дали е време да се создаде нова политичка партија во Соединетите Држави што претставува 80% од населението?“
Во серија објави, Трамп тврди дека „го замолил Маск да си замине“ и го обвинува дека „го изгубил разумот“. Тој предлага раскинување на сите владини договори со компаниите на Маск. Маск одговара дека веднаш ќе започне со повлекување на вселенското летало „Драгон“ од употреба. Маск оди чекор понатаму, тврдејќи без докази дека Трамп е во „досиејата на Епштајн“. Тој исто така ја критикува тарифната политика на Трамп, тврдејќи дека таа ќе предизвика рецесија до крајот на годината.
Петок, 6 јуни
Во интервју за Еј-Би-Си (ABC), Трамп го нарекува Маск „човек кој го изгубил разумот“ и вели дека нема планови да го контактира. Белата куќа вели дека разговор со Маск не е закажан, иако претходно беше објавено дека тие би можеле да се слушнат.
Американските медиуми, исто така, објавуваат дека Трамп размислува да го продаде својот автомобил Тесла, кој претходно го набавил за да помогне во промоцијата на компанијата на Маск.