Холандија побара европска мисија во Бугарија за Шенген

Холандија официјално побара од Европската комисија дополнителна мисија за проверка на фактите во Бугарија, објави државното радио БНР.

Мисијата е поврзана со ветото на Холандија за пристапување на Бугарија во Шенген зоната, на што се противи и Австрија.

Холандија е фокусирана на прашањата за владеење на правото, додека Австрија има резерви за безбедноста на границите.

Барањето на оваа мисија пред повеќе од еден месец беше објавено од министерот за миграција на Холандија, Ерик ван дер Бург, а подоцна и од вршителот на должноста премиер Марк Руте, кој експлицитно нагласи дека од неа очекува целосен, а не „засладен извештај“ за владеењето на правото.

Холандија ја чека оценката за најновите законски измени во Бугарија, кои се однесуваат на контролата на јавниот обвинител, измените за антикорупциската комисија и подготвените уставни измени.

Комисијата уште еднаш изјави дека Бугарија и Романија ги исполнуваат условите за полноправно членство во Шенген и целосно ги поддржуваат.

В среда во Холандија ќе се одржат предвремени парламентарни избори. Според анкетите фаворит е партијата Нов социјален договор на чело со Питер Омцихт. Таа е десниот центар и се противи на идното проширување на ЕУ.

„За Омцихт приоритети се внатрешната политика и тешко може да се очекува позитивна одлука за Шенген“, изјави за БНР европратеничката Софија ин’т Велд од групацијата Обнови ја Европа.