Grubi: SHBA-ja e mbështet plotësisht Maqedoninë

Njeriu i parë i Kuvendit për miqësi me SHBA-në, deputeti Artan Grubi, njëherit edhe kryetar i Komisionit për Çështje Evropiane të Kuvendit të Republikës së Maqedonisë, realizoi takim pune në Departamentin e Shtetit në Uashington me u.d. zëvendësndihmës sekretar i shtetit, z. Mathew Palmer, transmeton Flaka

Në takim u shkëmbyen pikëpamje rreth kontestit me emrin, reformat, Marrëveshjes së Ohrit, luftës kundër terrorizmit dhe ekstremizmit të dhunshëm, si dhe situatës së përgjithshme politike në Maqedoni dhe rajon.

Palmer na inkurajoi të vazhdojmë të lëvizim përpara sepse këto kohëra janë sfiduese për të dyja palët dhe të gjithë duhet të ngrihen mbi politikën ditore.

Shtetësia kërkon guxim dhe kompromise – theksoi përfaqësuesi i lartë i Departamentit të Shtetit derisa e përshëndeti progresin në reforma, por e theksoi nevojën për zbatimin e ligjeve, posaçërisht në sferën e gjyqësisë.

SHBA-ja e mbështet plotësisht Maqedoninë në tentimet për tejkalimin e kontesteve me fqinjët dhe miratimin e reformave.

Grubi theksoi se Maqedonia e vlerëson mbështetjen e deritanishme të SHBA-së në planin politik dhe në planin ekonomik, por në frymën e proceseve të reja pozitive në vend të cilat paralajmërojnë prognoza optimiste për integrim të përshpejtuar të vendeve të rajonit, kërkoi që të valorizohen tentimet e Shkupit për realizimin e reformave të kërkuara për anëtarësim të shpejt në NATO.

Shumica parlamentare, por edhe qytetarët e Maqedonisë, me përkushtim punojnë në përmbushjen e pritjeve nga bashkësia ndërkombëtare dhe presim se edhe miqtë nga Uashingtoni, gjithashtu, do të veprojnë deri në vitin tjetër në pajtim me synimet tona.

Grubi informoi se progresi në zbatimin e reformave, me ç‘rast si prioritare i theksoi reformat gjyqësore dhe reformat e korpusit të sundimit të së drejtës dhe sistemit të sigurisë.

Në lidhje me negociatat për fqinjin tonë jugor, Grubi i elaboroi qëndrimet në bazë të ideve të Nimicit, me ç’rast e kërkoi mbështetjen e SHBA-së për arritjen e zgjidhjes së pranueshme në mënyrë reciproke dhe konsekuente.