Голем успех на антиимигрантската партија на Најџел Фараж на локалните избори во Британија

Британската антиимигрантска и сојузничка на Трамп партија Реформа оствари убедлив успех на локалните избори во Англија, предизвикувајќи ја традиционалната политичка доминација на двете главни партии во земјата, Лабуристичката партија и Конзервативната партија.

Најџел Фараж, лидерот на Реформaта, тврдеше дека неговата партија ги надминала ториевците како главна опозиција во Велика Британија откако Реформа освоија контрола врз најмалку шест окружни совети, едно градоначалничко место и тесно ја победија владејачката Лабуристичка партија на парламентарните дополнителни избори на она што се сметаше за сигурно место.

Со оглед на тоа што во петокот уште се пребројуваа гласовите од изборите на 1 мај, вкупниот број гласови за лабуристите и конзервативците се чини дека падна далеку под 50%, што е првпат тоа да се случи во модерната политичка историја.

Во некои окрузи во Мидлендс и северна Англија, Реформа освои повеќе од 60 отсто од гласовите, искористувајќи го разочарувањето од лабуристичката влада и од ториевците како опозиција, како и од нивното управување со земјата од 2010 до 2024 година. Реформа водеше кампања главно врз антиимигрантски чувства, кои Фараж долго време се обидува да ги негува. Либералните демократи, исто така, остварија поскромен напредок во некои совети, главно на сметка на конзервативците.

Низ целата земја, Реформа освои 30% од гласовите, оставајќи ги лабуристите на второ место со 20%, либералните демократи со 17%, а конзервативците на четврто место со 15% од гласовите.

Единствените парламентарни дополнителни избори што се одржаа во четврток беа во Ранкорн и Хелсби, во близина на Ливерпул, на северозападниот дел на Англија, каде што актуелниот пратеник од Лабуристичката партија беше осуден за удирање на избирач. Тоа беше солидно место на Лабуристичката партија кое го освои со 53% од гласовите на општите избори, но загуби со шест гласа од Реформа во четврток, како прекор до премиерот, Кир Стармер.

Стармер призна дека резултатите биле „разочарувачки“ и рече дека ќе извлече поуки од неуспехот, додавајќи: „Треба да одиме побрзо кон промената што луѓето сакаат да ја видат“.

Политичките аналитичари рекоа дека Реформа се покажала особено добро во областите со многу пензионери и малку дипломирани студенти.

Лидерката на конзервативците, Кеми Баденох, рече дека резултатот покажува оти земјата е „презаситена“ од лабуристичката влада, но „сè уште не е подготвена да ни верува“.

Зборувајќи на митинг во Дурам, каде што Реформ освои 65 од 98-те места во советот, Фараж тврдеше дека гласањето „значи крај на политиката на две партии каква што ја знаеме повеќе од еден век во оваа земја“. Тој рече дека тоа е „почеток на крајот на Конзервативната партија“.