Ѓорѓија Сајкоски од ВМРО-ДПМНЕ да ја предводи листата во петтата изборна единица

ВМРО-ДПМНЕ ја разреши и последната дилема, со одлуката генералниот секретар Ѓорѓија Сајкоски да ја предводи кандидатската листа во петтата изборна единица на опозициската партија. Од претходно е познато дека носители ќе бидат Христијан Мицкоски во кецот, Владо Мисајловски во двојката, Драган Ковачки во 3 ИЕ, Александар Николоски во четвртта и Дафина Стојаноска во шестката.

Партиската програма, ВМРО-ДПМНЕ ќе ја промовира веќе в недела..

Утре на конгрес носителите, но и целосните кандидатски листи ќе ги утврди и владејачката СДСМ. Засега потврда дека ќе се најдат на водечките места има за партискиот лидер Димитар Ковачевски во првата ИЕ, на која како коносител ќе биде претседателката на ЛДП Моника Зајкова, а дека ќе се најде на првото место од некоја листа е потврдено и за заменик-претседателката на СДСМ Сања Лукаревска. Во албанскиот блок се уште нема потврдени информации за листите на ДУИ, додека пак здружената опозициска коалиција „Вреди“ треба да донесе одлука уште за носител на петтата изборна единица, место резервирано за Алијанса за Албанците. Официјално соопштија дека Изет Меџити ќе биде во првата ИЕ, во двојка Африм Гаши, а во шестката Биљал Касами.