Ѓорѓиевски платил казна, но  до петок ќе поднесе анкетен лист за имотната состојба

Новиот градоначалник на Град Скопје Орце Ѓорѓиевски нема поднесено анкетен лист до Антикорупциска, но тоа ќе го направи до петок.

– Во однос на казната имам една казна и таа е платена. Тоа е моја грешка. Човек сум јас како и сите други. Поради обврските во Градот не сум стигнал. До петок ќе биде поплнет анкетниот лист, а казната ми е платена. Треба секој којшто има одговорност да си постапи согласно она што е негова одговорност и да си ги сноси последиците доколку направи грешка – рече Ѓорѓиевски одговарајќи на советничко прашање на денешната седница.

– Мојата имотна состојба не е ништо поразлична од состојбата кога сум бил советник во Општина Кисела Вода и тоа со допис го имам испратено и до Антикоруциската комисија – рече Ѓорѓиевски.

Пред неколку дена, претстедателот на Антикорупциска, Адем Чучуљ, беше прашан и за анкетниот лист на скопскиот градоначалник Орце Ѓорѓиевски, за кого потврди дека наспроти законската обврска, сè уште ја нема пријавено имотната состојба уште кога беше градоначалник на Кисела Вода, а ниту откако беше избран за скопски градски татко.

„Пуштени му се и двата прекршочни налози и за Кисела Вода и за Град Скопје и уште е во фаза за постапка за порамнување“, рече Чучуљ, пред пет дена.(Б.Б.)