Ѓоковиќ доби понуда да глуми во филм за Никола Тесла

Новиот проект на српскиот актер и продуцент Милош Биковиќ е за животот на пронаоѓачот Никола Тесла, а една улога е наменета за тенисерот Новак Ѓоковиќ.

Идејата да застанат во ист кадар се роди, како што рече Биковиќ, по премиерата на филмот „Надвор од границите на реалноста“ каде што присуствуваше и Новак.

„За да постигнете резултати како неговите, мора да имате одредени вредности, како што се дисциплина, џентлменски став, откажување, аскетизам… Сето ова го формира шампионскиот менталитет. Затоа тој дојде на премиерата и јас сум му многу благодарен, како и за сè што прави за Србија. Му понудив да се појави во филмот за Тесла, кога и да посака. Секако, тој не може да ја игра главната улога, затоа што тогаш ќе мора да се посвети на тоа, така Новак би морал да се откаже од тенисот и да биде само Тесла“, рече Биковиќ за време на фестивалот LIFE во Лесковац.