ФЕИТ организира меѓународна школа за е-здравје
Факултетот за електротехника и информациски технологии (ФЕИТ) организира тематска „Зимска школа за е-здравје и паметни уреди и технологии“, во рамки на европскиот проект WideHealth.
Меѓународната школа, како што соопшти Факултетот, ќе се организира хибридно – со физичко присуство на ФЕИТ и онлајн од денеска до 17-ти месецов. На зимската школа учествуваат 133 учесници од земјава, Португалија, Германија, Италија, Словенија, Нигерија, Перу, Франција и Јапонија. Школата ќе биде фокусирана на следните теми: паметни уреди и технологии, е-здравје; здравство водено од податоци; вештачка интелигенција и машинско учење за здравство; анализа на податоци; паметни уреди и пресметување.
Како дел од школата, ќе се организира и меѓународен натпревар од областа на вештачката интелигенција и машинското учење, во кој што учесниците ќе развиваат алгоритам за препознавање на човечки активности со помош на паметни уреди што се носат, како што се паметен телефон и паметен часовник. На крајот на натпреварот, кој завршува во четврток, ќе се направи крајната евалуација и најдобрите тимови ќе бидат промовирани и наградени.
-За координаторот на проектот, доцент д-р Христијан Ѓорески, школата претставува одлична можност за студентите да се стекнат со знаење од областа на вештачката интелигенција и машинското учење применети во здравството. На школата ќе предаваат реномирани експерти од познати светски научни институции од Велика Британија, Швајцарија, Италија, Португалија и Словенија. Ова е одлична прилика студентите да развијат вештини за работа со здравствени податоци, да се натпреваруваат и да остварат контакти со нивните колеги од странство. Европскиот проект WideHealth дава одлична прилика за подобрување на научно-истражувачките капацитети на ФЕИТ и УКИМ и за усовршување на голем број млади истражувачи во овие области. Практичната настава и вежбите се поддржани од асистенти и истражувачки кадар од ФЕИТ, но и кадар од другите институции кои учествуваат во проектот, се наведува во соопштението.
Еден од водечките партнери во проектот, како што посочуваат од ФЕИТ, е италијанскиот истражувачки центар FBK (Fodazione Bruno Kessler), со експертиза во областа на електронското здравје. Професор д-р Оскар Мајора, раководител на одделот за Дигитално здравје во FBK, е и водечки експерт во проектот и лично ќе биде присутен на школата со две предавања. Според него, укажуваат од ФЕИТ, овој проект е одлична можност да се споделат знаења на темата за електронско здравје, особено да се збогатат знаењата на студентите во овие области, како и нивна обука во спроведување на истражување на оваа тема со поддршка на експерти и истражувачи од тие области.