Европското обвинителство обвини раководители на бугарска компанија за измама со проект вреден 3,46 милиони евра
Брисел – Европското јавно обвинителство денеска соопшти дека двајца раководители на бугарска компанија се обвинети за измама во проект финансиран од Европскиот фонд за регионален развој, вреден околу 3,46 милиони евра. Проектот се однесувал на изградба на објекти за обработка на отпад во Асеновград.
Според истрагата, во 2022 година, осомничените доставиле лажни податоци за професионалното искуство на клучен член од тимот, за да добијат договор за изградба на објект за компостирање на зелен и биоразградлив отпад, како и објект за претходна обработка на мешан комунален отпад. Компанијата примила аванс од 412.000 евра од националниот буџет и од европскиот фонд.
Истрагата открила дека договорот бил раскинат во април 2023 година, а компанијата го вратила речиси целиот исплатен износ.
Ако обвинетите бидат прогласени за виновни, се соочуваат со затворска казна од две до осум години.