ЕЦБ ќе ја провери отпорноста на банките на геополитички ризици

Европската централна банка (ЕЦБ) планира да ја провери отпорноста на банките во еврозоната на геополитички превирања следната година, изјави главниот супервизор Клаудија Бух, во контекст на сè поизразен фокус на ризиците, вклучувајќи ги тарифите и санкциите.

ЕЦБ долго време предупредува дека геополитиката е меѓу најголемите ризици за банките во еврозоната поради конфликтите во Украина и окупираниот палестински појас Газа и трговската војна што ја започна американскиот претседател Доналд Трамп.

Затоа, Централната банка на еврозоната одлучи да ја испита отпорноста на банките на овој вид ризик, менувајќи го сегашниот модел на проверки.

ЕЦБ обично им презентира неколку можни сценарија на банките, а тие мора да пресметаат колку капитал би изгубиле ако се остварат.

Во новиот преглед, ЕЦБ ќе им обезбеди примери за нивоата на исцрпување на капиталот и ќе ги замоли сами да смислат сценарија за активирање.

„На тематскиот стрес-тест во 2026 година, ќе го следиме тестот од оваа година и ќе побараме од банките да проценат кое сценарио за геополитички ризик би можело сериозно да влијае на нивната солвентност“, им рече Бух на европратениците.

Заедно со контролата, супервизорите со месеци ги предупредуваат банките да се подготват за политички мотивирани превирања, вклучително и глобален недостиг на долари доколку централната банка на САД ги повлече своите алатки за решавање кризи.

Како дел од редовниот надзор на ЕЦБ, на банките им е кажано да ја земат предвид изложеноста кон други земји, и преку операции во странство и преку кредити за извозници, изјавија извори од централната банка за Ројтерс.

Кибер нападите исто така се сметаат за ризик, особено во балтичките земји, кои беа мета на руски хакери, велат изворите.

Супервизорите не им кажуваат на банките да ја намалат изложеноста и не им даваат конкретни препораки во оваа фаза, но ги охрабруваат да ги заострат контролните механизми и да размислат за планови за непредвидени ситуации.

Портпаролот на ЕЦБ одби да ги коментира наводите на изворите.

Следната година, тестирањето на ЕЦБ ќе биде дел од сопствената проценка на банките за нивните капитални потреби, позната во регулаторниот жаргон како процес на проценка на внатрешната адекватност на капиталот.

ЕЦБ спроведува тематски прегледи на банките во еврозоната секоја втора година, а за време на „паузата“ Европскиот банкарски орган (ЕБА) ја проверува нивната отпорност на шокови на ниво на целата Европска Унија. Во 2024 година, ЕЦБ ја анализираше отпорноста на заемодавателите на сајбер ризици.

Резултатите од најновиот тест спроведен од ЕБА, кој вклучуваше некои американски тарифи во неповолното сценарио, ќе бидат објавени на почетокот на август.

Заканите на Трамп за воведување санкции врз купувачите на руска нафта исто така се сметаат за ризик. Главни купувачи се Кина, Индија и Турција.