Додик постојано повикуваше на распаѓање на БиХ, а по посетата на шефот на ЦИА на Сараево ја смени приказната

Лидерот на босанските Срби, Милорад Додик, тврди дека властите на Република Српска никогаш не го доведувале во прашање територијалниот интегритет и суверенитет на БиХ, а тоа го направи само еден ден откако директорот на американската ЦИА Вилијам Барнс ненајавено ја посети земјата.

Барнс вчера се сретна со сите тројца членови на Претседателството на БиХ во Сараево, иако таму е и Жељка Цвијановиќ која е под американски санкции.

Тој потоа имаше средба со директорот на Агенцијата за разузнавање и безбедност на Босна и Херцеговина (ОСА), Алмир Џув, како и со министерот за надворешни работи Елмедин Конаковиќ.

Другите функционери во Босна и Херцеговина, меѓу кои и Додик, беа заобиколени од директорот на ЦИА, но денеска актуелниот претседател на РС ја коментираше посетата на Барнс со објава на социјалната мрежа Х, тврдејќи дека тоа е значаен настан бидејќи борбата против тероризмот е заедничка обврска на целиот слободен свет.

Покрај изразувањето почит кон директорот на ЦИА, Додик напиша дека РС е посветена на оваа борба и ја поздравува секоја соработка.

Тој потоа го додаде тврдењето дека во РС не го доведуваат во прашање опстанокот на Босна и Херцеговина, иако тој лично тоа го правеше повеќе пати во минатото, предвидувајќи распад на таа земја и формирање на независна РС, односно нејзино отцепување, пишува Хина.

Борба против тероризма је обавеза цјелокупног слободног свијета и у том контексту је значајна посјета директора ЦИА господина Вилијама Бернса БиХ.
Република Српска је посвећена тој борби и поздравља сваку сарадњу у тој области.

Република Српска никада није спорила суверенитет и…

— Милорад Додик (@MiloradDodik) August 21, 2024

„Република Српска никогаш не го оспорила суверенитетот и територијалниот интегритет на БиХ во согласност со Дејтонскиот договор и отцепувањето никогаш не било наша политика. Но, Република Српска има право на политичка борба за својот статус, во согласност со писмото на Дејтонскиот договор“, вели сега Додик.

Тој додаде дека БиХ е заедница на два еднакви ентитети и три конститутивни народи и затоа, како што наведува, „го охрабрува ставот на Барнс дека одговорноста за функционирањето на земјата е на сите етнички заедници“.

Жељка Цвијановиќ, која била единствената српска функционерка која учествувала во разговорот со директорот на ЦИА, не кажа ништо за таа средба, но може да се претпостави дека за тоа го известила својот партиски шеф Додик.