Додик: Од денеска веќе ја нема БиХ, да дојде Вучиќ и да се договориме што ќе правиме
Претседателот на Република Српска, Милорад Додик, им се обрати на насобраните на митингот за поддршка во Бања Лука и упати сериозни обвинувања против судијата на Судот на БиХ, Сена Узуновиќ. „Кога ќе го видите Шмит, повикајте полиција за да можеме да го уапсиме и да го избркаме одовде. Тој не заслужува да помине низ српска земја, тој заслужува да биде каменуван, што и да ми кажете, но тој го направи првиот чин на насилство, јас имам право да се бранам“, рече Додик на митингот.
„Ќе се браниме на секој чекор. Нема да гонат никого за тоа. Денеска ќе го браниме и штитиме нашиот устав со нашата полиција и со нашето судство. Ова е право на Република Српска“, рече Додик.
„Затоа оваа борба е на политичко ниво. Ниту еден муслиман во Република Српска не треба да има проблеми. Ниту еден Србин кој прави каков било потег кон муслиманите ја нема мојата поддршка, ниту ќе ја има поддршката од Република Српска“, рече Додик.
Додик потоа зборуваше за судијката на Судот на БиХ, Сена Узуновиќ.
„Од нејзиното семејство, од судницата, бараа да контактираат со нашите луѓе. И тоа ќе го кажам за прв пат. Ќе кажам за прв пат. Значи, таа бараше контакт со нашите луѓе. И дојде нејзиниот близок роднина. И за тоа ќе зборувам подоцна, не денес. Снимен е. Побара неколку милиони за ослободителна пресуда. Значи, бидејќи тие не добија неколку милиони, тогаш јас сум крив, нели? И тоа е вашата правда“, упати сериозни обвинувања Додик.
Тој ја коментираше и претходната работа на судијката Узуновиќ, обвинувајќи ја дека ослободила криминалци кои убивале Срби.
Додик ги коментираше и неговите политички противници. „Потребна ми е поддршката од народот и ќе одам до крај“, изјави Додик.
„Имав два телефонски повици, првиот од Александар Вучиќ, вториот од Орбан“, изјави Додик.
„Вучиќ нека дојде утре во Бања Лука за да се договориме што ќе правиме и како ќе направиме. Од денеска веќе ја нема Босна и Херцеговина. Ви нудиме уставна БиХ. Само уште малку. Собранието ќе одлучи да го одбие. „Ќе донесеме закон за забрана на Обвинителството и Судот во БиХ“, рече Додик.