„Доби син и излезе во диско да ги почести другарите“: Тоше Богданов загина во дискотеката „Пулс“

Триесетгодишниот Тоше Богданов е една од жртвите во пожарот во дискотеката „Пулс“ во Кочани, а според неговите пријатели, во саботата излегол со пријателите да го прослави раѓањето на синот.

Богданов, кој бил од Облешево, работел како автомеханичар и живеел со сопругата која, според неофицијални информации, пред неколку дена го родила нивното дете.

„Тоше имаше син и излезе со пријателите да го прослави раѓањето на детето. Сакаше да ги почести и отиде во диско, а сега го нема“, рекол извор близок до семејството, пренесува „Макфакс“.

Најмалку 59 лица загинаа во пожарот во дискотеката во Кочани, а 155 се повредени, соопшти министерот за внатрешни работи Панче Тошковски.

Пожарот се проширил на таванот и покривот на дискотеката, кој брзо изгорел. Публиката на концертот, кој започнал на полноќ, беше претежно млада. Најмладата жртва имала само 14 години.

Во врска со трагедијата досега се приведени неколку лица.