До каде е постапката за „Пулс“, прашуваат родителите на настраданите

Денеска во Кочани се одржа 21. Марш за ангелите, на семејствата на починатите во трагедијата во дискотеката „Пулс“. Протестниот марш започна од 17 часот и 5 минути од Паркот на револуцијата, време кое симболично ја претставува задоцнетата институционална реакција.

Една жителка на Кочани на протестот, чиј брат загина на кобниот 16-ти март, во изјава за медиумите постави неколку прашања до судиите и јавните обвинители.

-Почитувани судии, во својство на оштетени во предметот кој се води во обвинителниот акт, донесен на 13.06.2025 година, имаме информација дека се уште не е оценет обвинителниот акт. Како што сме упатени, оваа фаза може да трае и повеќе месеци, но одолговлекување без оправдана причина е спротивно на законот и претставува основ за реакција од наша страна – оштетените или јавноста. Оценка на обвинителен акт нема строг рок, но должност е да одлучите во разумен рок, а поминаа скоро три месеци. Единствено се чека од вас. Ве молиме да ни оставите информации: до каде е постапката за оценка, дали постои одредени рок според кој Советот е должен да донесе одлука, доколку не, ве молиме да ни кажете кога приближно може да се очекува завршување на оваа постапка, рече Розета Џамова.