Црна Гора и СЕПА: Побрзи и поевтини трансакции од 5 октомври

Европскиот совет за плаќања (ЕПЦ), чадор тело на Единствената зона за плаќања во евра (СЕПА), го одреди 5 октомври 2025 година како датум за оперативна подготвеност на црногорските банки да мигрираат во шемите за плаќање СЕПА, објави Централната банка на Црна Гора.

„Ова значи дека од 5 октомври 2025 година граѓаните и стопанството на Црна Гора ќе можат да ги вршат првите трансакции преку системот СЕПА, кој овозможува побрз и многу поевтин трансфер на пари во рамките на Европската унија и пошироко. Оваа одлука следи по ажурирањето на соопштението за ЕПЦ на 15 јануари 2025 година и претставува значаен чекор во интеграцијата на црногорскиот платен систем со европските стандарди“, соопшти ЦБМ.

Зададениот датум, како што посочуваат, им остава на црногорските банки и давателите на платежни услуги, како и на учесниците во платниот систем СЕПА во други земји, дополнителен простор за техничко усогласување, едукација на корисниците и оптимизација на оперативните процедури со цел да се обезбеди непречено поврзување и обезбедување на услуги преку шеми за плаќање СЕПА.