Цените на гасот во Европа се највисоки од крајот на 2022 година
Новиот скок на цените го поттикна ескалацијата на војната на Блискиот Исток
Цените на гасот во Европа достигнаа највисоко ниво од крајот на 2022 година во средата, откако нов бран вооружени конфликти на Блискиот Исток се совпадна со забрзаното полнење на складиштата во ЕУ пред грејната сезона.
Мегават-час гас за испорака во октомври чинеше 78,77 евра на холандската берза ТТФ утрово, најскап од втората половина на декември 2022 година. Во споредба со вчерашното затворање, неговата цена беше повисока за 3,9 проценти.
Новиот скок на цената беше предизвикан од ескалацијата на војната на Блискиот Исток.
Американската војска објави дека во саботата нападнала три танкери што превезувале иранска нафта, како дел од поморската блокада и заострените санкции кон Иран.
Техеран одговори неколку часа подоцна со напад на три танкери, објаснувајќи дека минуваат низ Хормуз по рута што не е одобрена од иранската војска. Сите бродови што користат такви рути можат да сметаат на напад, предупреди морнарицата на Иранската револуционерна гарда.
Просечно 10 комерцијални бродови дневно минувале низ Ормускиот теснец во текот на изминатите 10 дена, што е најмалку од мај, покажаа податоците од аналитичката фирма „Кплер“ во понеделник.
Пред војната, околу една петтина од светските пратки на течен природен гас (ЛНГ) минуваа низ Ормуз, а помеѓу март и август, извозот на ЛНГ од регионот на Персискиот Залив се намали за повеќе од 85 проценти во однос на истиот период минатата година, според „Кплер“.
Скудното снабдување предизвика жестока конкуренција меѓу европските и азиските купувачи за преостанатите пратки.
Екстремната топлина во поголемиот дел од Азија предизвика пораст на побарувачката за енергија за системи за ладење, па во текот на летните месеци, голем дел од ЛНГ што инаку би се наполнил во летната сезона пред почетокот на грејната сезона заврши во азиските земји наместо на Стариот континент, објави Ројтерс.
Според податоците, капацитетите за складирање гас во ЕУ беа исполнети до 67,12 проценти во вторникот. На истиот ден во 2025 година, капацитетите беа исполнети до 79,48 проценти.