Бугарија доби најдобри места во Европарламентот од влегувањето во ЕУ
![](https://nezavisen.mk/wp-content/uploads/2024/07/Европски-парламент.jpg)
На македонската јавност добро познатиот Андреј Ковачев од ГЕРБ (ЕПП) стана еден од петтемина квестори во Европскиот парламент (задолжени за административни работи), што е највисока функција во законодавното тело за Бугарија од нејзиното влегување во ЕУ во 2007.
Но не е само тоа. Во распределбата на членовите и раковоствата на комисиите, Илхан Ќучук (досегашен известувач за Македонија), стана претседател на правната комисија на Европскиот парламент. Ќучук, член на партијата ДПС, е дел од либералната група во парламентот, Обнови ја Европа. Вкупно петмина од 17-те европратеници од Бугарија добија раководни функции во телата.
Андреј Ковачев е член и на комисијата за надворешни работи на Европскиот парламент, а покрај него член е и Станислав Стојанов од националистичката партија Преродба.
Европскиот парламент во тактичка игра успеа да ги блокира претставниците на новата група, Патриоти за Европа, каде членуваат партиите на Марин Лепен и Виктор Орбан, да бидат избрани на раководни места во комисиите. Овој „санитарен кордон“ беше направен заеднички меѓу Европската народна партија, социјалистите, либералите, зелените, конзервативците, но и крајната левица, која доби едно раководно место.