Белград одговори со репресија за протестите, ќе им ги намалува платите на учесниците

Министерството за образование на Србија испрати известување до директорите на основните и средните училишта, според кое при пресметувањето на јануарската плата треба да им се намали на вработените кои учествуваа во штрајкот, јави ТВ Н1. Дописот е испратен до училиштата „поради многубројните и чести обраќања на наставници, просветни работници, директори на училишта и родители на ученици поврзани со спроведувањето на прописите за работни обврски и штрајкови во системот на образование и обука“, соопшти Министерството.

„Во согласност со состојбите поврзани со штрајкот на вработените од една страна, и обврските на работодавачот од друга страна, укажуваме на следните одредби од законот: Одредбите од член 14 од Законот за штрајкови предвидуваат дека организирањето штрајк, односно учеството во штрајк под условите утврдени со овој закон претставува повреда на работната обврска, не може да биде основа за поведување постапка за утврдување на дисциплинска и материјална одговорност на работникот и не може да резултира со престанок на работен однос“, пишува во дописот до кој имале увид од ТВ Н1.

Голем број училишта во Србија денеска го продолжуваат прекинот на наставата, кој од понеделник се проширува, а кон него се приклучуваат и просветните работници кои сакаат да ги поддржат блокадите на студентите и не се задоволни од договорот на репрезентативните синдикати со Владата за покачување на платите.

Во Србија денеска се одржува генерален штрајк, односно „општа граѓанска непослушност“, на кој повикаа студентите кои се во блокада.