Бајден и Стармер не дадоа „зелено светло“ на Украина за ракетите од долг дострел

Американскиот претседател Џо Бајден и британскиот премиер Кир Стармер ја потврдија својата „непоколеблива поддршка“ за Украина, се вели во соопштението на Белата куќа.Во соопштението објавено по средбата во Вашингтон не се споменува прашањето за олеснување на ограничувањата за употребата на донираните оружја со долг дострел од Украина за цели на руска територија.

Се очекуваше Стармер да се обиде да го убеди Бајден за ова прашање на состанокот одржан во услови на знаци дека сојузниците на Украина стануваат поспремни да ги ублажат ограничувањата за употреба на оружје со долг дострел. Но, во соопштението на Белата куќа по средбата не се споменува таа тема, туку неколку општи оценки, со ветување за континуирана поддршка за Украина.

„Лидерите имаа детална дискусија за голем број надворешнополитички прашања од заеднички интерес. Тие ја потврдија својата непоколеблива поддршка за Украина додека таа продолжува да се брани од руската агресија“, се вели во соопштението.

Единственото друго спомнување на војната во Украина беше да се изрази „длабока загриженост поради тоа што Иран и Северна Кореја обезбедуваат смртоносно оружје за Русија и кинеската поддршка за руската одбранбена индустриска база Пред состанокот, портпаролот на Белата куќа рече дека нема промена.

„Нема промена во нашиот став за одредбите за ударни способности на долг дострел што Украина би ги користела во Русија“, изјави портпаролот на Белата куќа за национална безбедност Џон Кирби.

САД претходно соопштија дека ја ограничиле употребата на оружјето поради загриженост дека дозволувањето на Украина да удри длабоко во Русија може да ја ескалира војната и веројатно да ја поттикне Русија да користи нуклеарно оружје.

Бајден и Стармер се состанаа еден ден откако американскиот државен секретар Ентони Блинкен (Антони) ја заврши турнејата низ Европа каде што слушна повеќекратни апели од Украина и нејзините сојузници за укинување на ограничувањата. Тој на крајот од патувањето рече дека тоа ќе му го пренесе на Бајден, истакнувајќи дека САД веќе ја прилагодуваат својата политика за да одговорат на ситуацијата на бојното поле.

Во мај, Бајден ја смени американската политика за да и дозволи на Украина да истрела проектили донирани од САД во Русија за да се одбрани од големата руска офанзива која вклучува проектили и беспилотни летала испукани од руска територија. Бајден го задржа ограничувањето на растојанијата до кои американските ракети би можеле да ја погодат руската територија, што значи дека Украина може да погоди цели само во региони блиску до границата.

Претходно, со изјава Бајден сепак ја отфрли заканата од рускиот лидер Владимир Путин за војна со Западот доколку сојузниците на Украина дозволат да користи нивно оружје за да напаѓа цели подлабоко во Русија.На прашањето што мисли за заканата на Путин, Бајден одговори: „Не размислувам многу за Владимир Путин“.

Стармер не ги спомна проектилите ниту во кратки коментари пред да започнат официјалните разговори, велејќи само дека Украина е важна тема и: „Мислам дека следните неколку недели и месеци би можеле да бидат клучни. Многу, многу важно ја поддржуваме Украина во оваа витална војна за слобода“.