Средба Силвестри – Ангеловска-Бежоска: Важно е одржување на независноста на централната банка

Улогата и независноста на централните банки, особено во вакви кризни времиња е многу важна, порачал италијанскиот амбасадор, Андреа Силвестри на средбата со гувернерката на Народната банка, Анита Ангеловска-Бежоска.

Амбасадорот Силвестри, како што наведува Народната банка во соопштението до медиумите, изрази задоволство од активностите и мерките коишто се преземени од страна на НБ во справувањето со економските последици од кризата и одржувањето на макроекономската стабилност. Исто така, амбасадорот истакнал дека ги цени напорите за одржување на прудентна монетарна и фискална политика заради состојбата на пандемија, а со цел да се обезбеди економска ревитализација во земјата во текот на 2021 година.

На состанокот, гувернерката Ангеловска-Бежоска се осврна на мерките преземени за справување со предизвиците предизвикани од корона-кризата, како и макроекономските проекции на Народната банка според кои се предвидува економски раст од 3,9 отсто и инфлација од околу 1,5 отсто за 2021 година. Притоа, ја истакна важноста од соработката со меѓународните финансиски институции, како и со европските институции, за обезбедување соодветни извори на финансирање, структурни реформи коишто на среден рок ќе го зголемат потенцијалот на економијата, но и за натамошно градење на институционалните капацитети.

Гувернерката Ангеловска-Бежоска и италијанскиот амбасадор Силвестри изразија цврсти заложби за продолжување и продлабочување на соработката во иднина. Средбата претставуваше можност и за потврдување на италијанската поддршка кон европската ориентација на земјата, којашто треба да се поттикнува и преку соработка на сите полиња, се вели во соопштението на Народната банка.