Актерот Кифер Сатерленд уапсен за напад врз возач во Холивуд

Канадскиот актер Кифер Сатерленд е уапсен под сомнение за напад и закана врз возач на споделено возење во Холивуд, соопшти полицијата, објави Би-Би-Си. Услугите за споделено возење се однесуваат на споделен превоз, или такси кои користат мобилни апликации за поврзување на патниците со блиските возачи, и се разликуваат од традиционалните такси по тоа што користат приватни возила.

Полициската управа на Лос Анџелес (LAPD) вели дека Сатерленд „влегол во возило за споделено возење, физички го нападнал возачот (жртвата) и упатил кривични закани“. Инцидентот се случил во 00:15 часот по локално време во понеделник на раскрсницата на Сансет булевар и Ферфакс авенија, а Холивудската дивизија на LAPD истражува.

Жртвата не е повредена во инцидентот, додаде полицијата. Сатерленд (59) е ослободен откако платил кауција од 50.000 долари и е закажано да се појави на суд на 2 февруари. Неговите претставници сè уште не го коментирале случајот.

Претходни средби со законот
Сатерленд, познат по улогите на Џек Бауер во серијата „24“ и на претседателот на САД во серијата „Designated Survivor“, е син на актерот Доналд Сатерленд.

Актерот е уапсен и претходно. Во 2007 година, тој беше осуден на 48 дена затвор за возење во пијана состојба и кршење на условната казна. Тој беше уапсен и за напад во 2009 година, но тоа обвинение подоцна беше отфрлено. Последен пат беше уапсен во 2020 година откако изврши нелегално полукружно свртување во Холивуд.