Судот во Хамбург треба да одлучи дали ќе продолжи судењето за експлозиите на „Северен тек“

Судот во Хамбург денеска треба да донесе одлука дали ќе продолжи судењето на Украинецот обвинет за организирање на нападите врз руските гасоводи „Северен тек“ кон Германија.

Одбраната на Серхиј Кузнецов поднесе барање да се запре постапката. Сојузниот обвинител сè уште може да одговори на барањето пред да одлучи судот во северниот германски град Хамбург.

Доколку барањето биде одбиено, судењето веднаш ќе продолжи. Вештак од Сојузната криминалистичка полиција потоа ќе даде исказ во врска со штетата на гасоводите и причината за експлозиите.

На 26 септември 2022 година, неколку експлозивни направи детонираа на морското дно во Балтичкото Море, во близина на данскиот остров Борнхолм, на длабочина од околу 80 метри. Двата гасоводи „Северен тек 1“ и „Северен тек 2“ беа сериозно оштетени. Вкупно се појавија четири протекувања на три од четирите делници на гасоводот.

Кузнецов (50) се наоѓа на обвинителна клупа за она што се смета за веројатно најспектакуларниот чин на саботажа во повоената германска историја, пренесе ДПА.

Обвинителите го обвинуваат дека бил мозокот зад уништувањето на гасоводите. Се тврди дека ги извршил експлозиите заедно со уште шест други лица.

Обвинението вклучува воени злосторства врз основа на користење забранети методи на војување во напад врз цивилни објекти. Кузнецов исто така се товари за предизвикување експлозија, уништување објекти и нарушување на јавните комунални услуги.

Пред нападот, „Северен тек 1“ транспортираше руски природен гас за Германија, додека „Северен тек 2“ сè уште не беше пуштен во употреба. Гасоводите станаа фокусна точка на контроверзии поради големата зависност на Германија од руски енергенси.