Летонците денеска избираат нов парламент

Околу 1,5 милиони гласачи во Летонија денеска излегуваат на гласачките места за да изберат 100 претставници во новиот парламентарен состав, поради загриженоста за националната безбедност и зголемувањето на трошоците за живот.

Според анкетите, се очекува дека околу половина од 14-те партии и изборни коалиции што учествуваат на изборите ќе го поминат изборниот праг за влез во парламентот. Се предвидува дека ниту една партија нема да освои апсолутно мнозинство, пренесува ДПА.

Во анкетите пред денот на изборите води центристичко-конзервативната изборна коалиција Обединета листа на премиерот Андрис Кулбергс. Тој моментално предводи коалиција од четири конзервативни и центристички партии. Меѓутоа, останува отворено прашањето дали оваа коалиција ќе продолжи да владее по овие избори, единаесетти откако Летонија доби независност од Советскиот Сојуз во 1991 година.

Сложениот процес на составување коалиција почна да се гледа дури и пред самото гласање. Имено, Кулбергс во мај ја презеде функцијата во оваа балтичка држава што граничи со Русија и Белорусија откако претходната влада се распадна поради спор околу инциденти со беспилотни летала. Два украински дрона скршнаа од курсот и се урнаа во близина на руската граница, предизвикувајќи тензии со Русија.

Војната на Русија против Украина во Летонија се смета за директна закана за националната безбедност. Инцидентите, исто така, повторно отворија чувствителни прашања, како што е употребата на рускиот јазик. Загрижена за заканите од воздух, Летонија побара поддршка од своите сојузници во НАТО за да обезбеди безбедно спроведување на изборите. Пред изборите, Германија испрати четири борбени авиони „Еурофајтер“ во Летонија за да го заштити воздушниот простор.

Летонија е еден од најблиските партнери и поддржувачи на Украина, што е малку веројатно да се промени по изборите, исто како и јасната надворешна политика на земјата кон ЕУ и НАТО.

Летонија, земја со население од 1,9 милиони, издвојува нешто помалку од пет проценти од својот бруто домашен производ за одбрана, што остава помалку простор за инвестиции во другите области.

Здравствениот систем е под голем притисок, додека дополнителни перманентни предизвици се емиграцијата и стареењето на населението. Многумина се жалат на високите цени и ниските плати, а економијата е забавена.

Популистичките партии го користат ова незадоволство, а некои од нив заземаат проруска позиција. Две од нив имаат реални изгледи да влезат во парламентот, делумно затоа што привлекуваат гласачи од големото руско етничко малцинство во земјата.