Повеќе од 54 отсто од електричната енергија во ЕУ доаѓа од обновливи извори, сончевата енергија на прво место

Повеќе од половина од електричната енергија произведена во Европската Унија во вториот квартал од 2026 година доаѓа од обновливи извори, според најновите податоци на Евростат.

Во периодот од април до јуни, обновливите извори учествуваа со 54,1 процент од вкупното производство на електрична енергија во ЕУ, што е мало намалување во споредба со 54,3 проценти во истиот период минатата година.

Сончевата енергија беше најголемиот поединечен извор на обновлива електрична енергија во ЕУ и учествуваше со 41,6 проценти од вкупното производство на електрична енергија од обновливи извори. Нејзиното учество значително се зголеми од 37 проценти, што беше во вториот квартал од 2025 година.

На второ место беше енергијата на ветерот со учество од 27,7 проценти, додека хидроенергијата учествуваше со 22,6 проценти од производството на електрична енергија од обновливи извори.

Останатите 7,7 проценти се однесуваа на горива од обновливи извори, како што е биомасата, додека геотермалната енергија и другите обновливи извори учествуваа само со 0,4 проценти.

Податоците од Евростат покажуваат и големи разлики меѓу земјите-членки на ЕУ.
Најголем удел во електричната енергија произведена од обновливи извори во вториот квартал забележа Латвија – дури 97,7 проценти. Во таа земја доминираат хидроенергијата и сончевите извори.

Следува Данска, каде што 94,3 проценти од електричната енергија се произведува од обновливи извори, првенствено благодарение на енергијата на ветерот.

Хрватска е на третото место со удел од 92,2 проценти, при што хидроенергијата има најголем придонес.

На другиот крај од скалата е Словачка, каде што обновливите извори учествуваа само со 19,8 проценти во производството на електрична енергија. Следуваат Чешка со 20,9 проценти и Малта со 24,5 проценти.

Иако вкупниот удел на обновливите извори во производството на електрична енергија во ЕУ е малку намален во споредба со минатата година, структурата на производството покажува силен раст на сончевата енергија, која во вториот квартал ја зазеде водечката позиција меѓу обновливите извори.