11 февруари во историјата – Нелсон Мандела е ослободен од затвор

Нелсон Мандела, лидер на движењето за ставање крај на јужноафриканскиот апартхејд, беше ослободен од затвор по 27 години на 11 февруари 1990 година.

Во 1944 година, Мандела, адвокат, се приклучи на Африканскиот национален конгрес (АНЦ), најстарата црнечка политичка организација во Јужна Африка, каде што стана лидер на младинското крило на АНЦ во Јоханесбург. Во 1952 година, тој стана заменик-национален претседател на АНЦ, заговарајќи ненасилен отпор кон апартхејдот – институционализираниот систем на белата надмоќ и расна сегрегација во Јужна Африка. Сепак, по масакрот на мирните црни демонстранти во Шарпвил во 1960 година, Нелсон помогна да се организира паравоен огранок на АНЦ за да се вклучи во герилска војна против владата на белото малцинство.

Во 1961 година беше уапсен за предавство, но иако беше ослободен повторно беше уапсен во 1962 година поради илегално напуштање на земјата. Осуден на пет години во затворот Робен, тој повторно беше изведен пред суд во 1964 година под обвинение за саботажа. Во јуни 1964 година, тој беше осуден заедно со неколку други водачи на АНЦ на доживотен затвор.

Мандела ги помина првите 18 од своите 27 години заточеништво во бруталниот затвор на островот Робен. Затворен во мала ќелија без кревет или вода, тој бил принуден да работи напорна работа во каменолом. Можел да пишува и прима писмо еднаш на секои шест месеци, а еднаш годишно му било дозволено да се сретне со посетител на 30 минути. Сепак, решителноста на Мандела остана непрекината и додека остана симболичен лидер на движењето против апартхејдот, тој го предводеше движењето на граѓанска непослушност во затворот што ги принуди јужноафриканските власти на драстично подобрување на условите на островот Робен. Подоцна беше преместен на друга локација, каде живееше во домашен притвор.

Во 1989 година, Ф.В. Де Клерк стана јужноафрикански претседател и реши да го укине апартхејдот. Де Клерк ја укина забраната за АНЦ, ги суспендираше егзекуциите и во февруари 1990 година нареди ослободување на Нелсон Мандела.

Мандела потоа ја предводеше АНЦ во нејзините преговори со малцинската влада за крај на апартхејдот и воспоставување мултирасна влада. Во 1993 година, Мандела и Де Клерк заедно ја добија Нобеловата награда за мир. Една година подоцна, АНЦ освои изборно мнозинство на првите слободни избори во земјата, а Мандела беше избран за претседател на Јужна Африка.

Мандела се повлече од политиката во 1999 година, но остана глобален поборник за мир и социјална правда до неговата смрт во декември 2013 година.