За првпат Македонската филхармонија ќе го прослави роденденот во сопствен објект

Македонската филхармонија во петок ќе одбележи 73 години од постоењето. По овој повод го најавува концертот „Среќен ти роденден!“ на чија програма се Прелудиум за оркестар бр. 2 од македонскиот композитор Панде Шахов, виртуозниот Концерт за виолина и оркестар бр. 1 од Карл Голдмарк на кој како солист ќе настапи македонскиот истакнат виолинист Љубиша Кировски, како и атрактивната симфониска поема „Американец во Париз“ од Џорџ Гершвин.

На концертот ќе му претходи кус ретроспективен осврт на историјатот на Македонската филхармонија на музикологот Марко Коловски, а ќе биде најавена и скорешната изложба на фотографии „Маестро“, посветена на најзначајните диригенти на Македонската филхармонија. Спонзор на првата едиција „Маестро“ е „Арс Ламина“.

Македонската филхармонија, која е најстара институција од областа на музичко-сценската дејност во Република Македонија, новиот објект го доби по 73 години од постоењето и годинава за првпат во свој дом го слави роденденот.