Захарова обвини за „русофобично лудило“ околу доаѓањето на ОБСЕ

За време на подготовките за учество на седницата на Советот на министри за надворешни работи на ОБСЕ во Северна Македонија, руската страна наишла на „секакви препреки“, изјави портпаролката на Министерството за надворешни работи Марија Захарова.

„Можам да кажам дека за време на подготовката за учество на сите земји во Советот на министри за надворешни работи на ОБСЕ, на руската страна и се правеа секакви препреки и имаше внатрешни интриги меѓу западните земји. Некои од нив разбираат дека ситуацијата во ОБСЕ доведе до егзистенцијална криза на таа структура“, рече Захарова.

Како што додаде таа, другиот дел од западните земји „продолжуваат да притискаат на педалата на целосно русофобично лудило“.

Таа посочи и дека овој настан е „тест за ОБСЕ“.

„Последниве години оваа организација е доведена до тој степен што сите се прашуваат – што понатаму? Дали сите ќе гледаат окупација на таа градба, која ќе доведе до нејзино уништување, бидејќи нема да биде потребна?“, вели Захарова.

Таа потсети на моментот кога се формираше ОБСЕ.

„Организацијата беше формирана на самиот врв на конфликтот меѓу системите – светот тогаш беше биполарен – на врвот на Студената војна, кога сè уште се чувствуваше ужасот на кубанската ракетна криза. Оваа организација е формирана за да спречи нешто слично да се повтори, да најде заеднички јазик и да се обиде да изгради мостови. Мислам дека имаше многу повеќе елементи што секоја од државите ги вложи во таа структура. Некој отиде со продолжената рака на пријателството, искрено верувајќи дека е неопходно да се развие дијалог, додека некој, очигледно, сметаше дека овие мостови нема да бидат мостови на пријателство, туку мостови за пренесување арсенал за влошување на конфронтацијата. Различно ја третираа и различно ја користеа, а резултатите беа различни“, истакна таа.

Денес и високиот претставник на ЕУ за надворешна политика, Жозеп Борел, објави дека нема да се сретне со рускиот министер Сергеј Лавров додека престојува во Скопје. Борел ќе присуствува само на официјалната вечера денес и потоа ќе замине за Брисел, а слична најава има и за американскиот државен сектерат Ентони Блинкен кој ќе замионе за Израел. Најверојатно додека тие се тука Лавров нема ни да биде пристигнат во Скопје, нешто што го навести шефот на дипломатијата Бујар Османи деновиве.