За насилникот во „Инфомакс“ условна казна затвор од две години

Судот во Скопје изрече условна пресуда за насилниот упад во просториите на редакцијата на „Инфомакс“. Според оценката на судот, била загрозена безбедноста на новинарите и директно нападната слободата на изразување и правото на јавноста да биде информирана.

Обвинетиот Горан Спасов од Скопје беше прогласен за виновен за кривичните дела насилство и спречување службено лице во вршење службено дејствие. Судот му изрече условна казна затвор од две години, која нема да се изврши доколку во наредните пет години не стори ново кривично дело.

Покрај условната осуда, на Спасов му е изречен и заштитен надзор во траење од четири години, во чии рамки е задолжен да се подложи на лекување или социјална рехабилитација во соодветна специјализирана установа. Доколку не ги почитува обврските, казната затвор ќе биде активирана.

За време на судската расправа, обвинетиот целосно ги призна делата, им се извини на оштетените новинари кои присуствуваа во судницата и изрази каење за стореното.

Во образложението на пресудата, судот нагласи дека спречувањето на новинарите во вршењето на нивната работа не претставува напад само врз поединци, туку и врз правото на целата јавност да биде навремено и точно информирана.

Како олеснителни околности, судот ги земал предвид личните и семејните прилики на обвинетиот, фактот дека досега не бил осудуван, како и неговата здравствена состојба. Според наодот на судски вештак – психијатар, Спасов боледува од шизотипно растројство, кое влијае на контролата на импулсите и бара континуирана терапија.