Восочната фигура на Жерар Депардје отстранета од музејот Гревин во Париз

Париз – Восочната фигура на актерот Жерар Депардје е отстранета од најпознатиот музеј во Париз, по негативните реакции од посетителите поради наводите за неговото однесување со жени, соопшти музејот во понеделникот.

Одлуката да се отстрани фигурата од музејот Гревин, таканаречениот „Пантеон на восочни познати личности“, уследи по неодамнешната репортажа за актерот на француската телевизија што ја наруши неговата репутација во Франција и ширум светот.

Документарецот на Франс 2 покажа дека тој постојано правел непристојни забелешки и гестови за време на патувањето во Северна Кореја во 2018 година. Депардје исто така е под истрага за силување од 2020 година. Тој ги негира сите обвиненија.

Депардје (74) глумеше во стотици филмови во текот на повеќе од половина век, вклучително и француски класици како „Последното метро“, „Жан де Флорет“ и „Сирано де Бержерак“, и филмови на англиски јазик, вклучително и „Зелена карта“ и “Животот на Пи.”

Отстранувањето на восочната фигура се совпаѓа со тоа што францускиот министер за култура поведе дисциплинска постапка во врска со престижниот Орден на Легијата на честа на Депардје, што може да доведе до негово одземање. Како одговор, Депардје преку своите адвокати рече дека се откажува од честа. На актерот веќе му се одземени почестите во Канада и Белгија.

Семејството на Депардје го осуди, како што велат, заговорот против него, изразувајќи го своето неодобрување за „колективниот гнев“ насочен кон актерот во изјава објавена во француските медиуми. (АП)