Владата ќе се справува со негативната демографија
Отвораме процес на инклузивен дијалог за справување со негативните демографски трендови, процес што не е предизвик само за нашата држава туку и за голем дел од земјите на ЕУ и други во светот, изјави министерот за социјална политика, демографија и млади, Фатмир Лимани.
Министерот Лимани најави финансиска помош и даночни ослободувања кои ќе бидат во функција на националните демографски политики.
„Демографската обнова мора да биде севкупна, да ги опфати популациските, миграциските, семејно станбените, економските, социјалните, даночните и регионалните аспекти“, посочи министерот Лимани.
Во изјава за медиумите, министерот за социјална политика, демографија и млади, издвои дел од мерките кои министерството планира да ги воведе во наредниот период.
„Планираме зголемување на еднократна финансиска поддршка за првородено дете, драстично зголемување на еднократна финансиска поддршка за второ дете, воведување еднократна финансиска поддршка за родени близнаци, намалување на листата за чекање за сместување во детски градинки, даночно ослободување во висина од 30.000 евра за отворање на приватна детска градинка“, нагласи Лимани.
Премиерот Христијан Мицкоски на конференцијата рече дека ситуацијата со демографијата е алармантна. Во 2024 година, се родија 16.061 дете, а починаа 20.201 лице. Тоа е природен пад од 4.140 луѓе за само една година;
„Во последните 4 години, изгубивме повеќе од 33.000 жители – како да исчезна еден град од големина на Кавадарци или Кичево;
-Стапката на наталитет падна од 12,5% во 2010 година на само 8,8% во 2024. Ова не се само бројки. Ова е тишина што се шири“, рече Мицкоски.
Демографијата е приоритет на македонската влада, изјави Владимир Ѓорчев, национален координатор за демографија, млади и човечки ресурси.
„Во таа смисла ние во моментов ги анализираме буџетските можности што ги имаме, владината програма е за четири години, а во делот на демографските политики има два фундаментални елементи, а тоа е намалување на иселувањето и да се зголеми фертилитетот“, изјави Ѓорчев.