Вилијам и Кејт на црвениот килим на БАФТА среде драмата во кралското семејство

Лондон – Вилијам и Кетрин, принцот и принцезата од Велс заедно се вратија на гала доделувањето на филмските награди БАФТА по три години, среде драмата во кралското семејство.

Принцот Вилијам, облечен во бордо кадифено сако и црна вратоврска, и Кетрин (порано позната како Кејт Мидлтон) во розов фустан од Гучи до подот, прошетаа по црвениот тепих, но не застанаа да разговараат со печатот додека се пробиваа во Кралската фестивалска сала.

Внатре во зградата тие застанаа да разговараат со високи организатори на настанот, вклучувајќи го и извршниот директор на Саутбенк центарот во Лондон, во кој се наоѓа Кралската фестивалска сала каде што се одржа церемонијата. Дискутирајќи за некои од номинираните, Вилијам беше фатен на камерата како вели: „Мислам дека „Формула 1“ е фантастичен филм, главно поради музиката. Го гледав „Една битка по друга“ со Лео, мислам дека е доста добар.“

Двојката не присуствуваше минатата година. Во 2024 година, Вилијам пристигна сам на настанот бидејќи неговата сопруга се опоравуваше од абдоминална операција, за која подоцна се откри дека е поврзана со рак. Последен пат таа присуствуваше во 2023 година.

Со појавувањето на доделувањето на филмските награди БАФТА, двојката ја покажа својата решеност да ги остават настрана моменталните тешкотии на кралското семејство, пишуваат странските медиуми.

Сепак, беше јасно дека принцот Вилијам останува преокупиран со проблемите поврзани со Ендрју Маунтбатен-Виндзор, што и самиот го призна кога рече дека сè уште не го гледал „Хамнет“, номиниран за најдобар филм, бидејќи тоа бара опуштеност. Зборувајќи на црвениот тепих пред церемонијата во лондонската Кралска фестивалска сала, тој рече: „Морам да бидам сосема опуштен за тој филм, а во моментов не сум. Го оставам тоа за друга пригода“.

Спротивно на тоа, Кетрин, како што рече, го гледала исклучително емотивниот филм во саботата навечер и останала „во солзи“. Хамнет ја раскажува приказната за трагичната смрт на синот на Шекспир како дете и тагата на неговите родители.

„Всушност мислев дека е лоша идеја да го гледам пред церемонијата“, се пошегува принцезата. „Завршив со многу подуени очи. Прекрасно е снимен. И музиката исто така. Музиката е фантастична.“ Принцезата го пофали филмот на режисерката Клое Жао и неговиот „приказ на меѓугенерациска тага“.

Гламур на црвениот тепих

Принцот и принцезата прошетаа по црвениот тепих пред Кралската фестивалска сала во Лондон, каде што ги пречека Сер Кенет Олиса, лорд-поручник на Голем Лондон. На церемонијата им се придружија голем број ѕвезди, меѓу кои Леонардо Дикаприо, Тимоти Шаламе, Ема Стоун, Килијан Марфи, Глен Клоуз и Итан Хоук.

Зборувајќи за филмови и деца

Двојката коментираше и за други филмови. Вилијам рече дека сè уште не го гледал „Марти Суприм“ со Тимоти Шаламе, а филмот за вампири „Грешници“ го опиша како „малку мрачен“. „Го гледав „Една битка по друга“, беше навистина добар. Не очекувавме да започне така“, додаде тој. Принцезата, исто така, откри дека нивните деца, принцот Џорџ, принцезата Шарлот и принцот Луис, покажуваат зголемен интерес за филмови. „Имаме долг список на филмови што сè уште треба да ги видиме“, рече таа.

Емили Стилман, претседателка на Филмскиот комитет на БАФТА, се присети на нивниот претходен состанок: „Последниот пат кога те видов, беше бремена со Џорџ и ја правеше твојата магија на Хари Потер“. Таа се осврна на посетата на кралскиот пар на студијата „Ворнер Брадерс“ во 2013 година.

Вилијам ја доделува главната награда на вечерта

Принцот Вилијам е претседател на Британската академија за филмска и телевизиска уметност од 2010 година. Двојката седеше во првиот ред на церемонијата, чиј водител беше шкотскиот актер Алан Каминг.

Водителот во еден момент се пошегува за Вилијам. Откако го смени костимот, рече: „Да, го сменив костимот, ви благодарам што забележавте, принцу Вилијам“, што предизвика смеа кај идниот крал и кралица.

Принцот беше задолжен да ја додели највисоката чест на Академијата, стипендијата БАФТА, на Дама Дона Ленгли, претседателка на NBC Universal Entertainment, за нејзиниот извонреден придонес во филмот. Во својот говор, Вилијам ја опиша Дама Дона како „исклучителна“. „Нејзината решителност и посветеност ја направија една од највлијателните и најпочитуваните личности во индустријата за забава“, рече тој.

„Таа беше првата Британка што раководеше со големо холивудско студио, а сега е претседател на NBCUniversal Entertainment. Нејзиното трансформативно лидерство и непоколеблива посветеност на креативни партнерства ги донесоа некои од најзначајните филмови на овој век на големото платно и на публиката ширум светот“, продолжи Вилијам. Тој, исто така, ја пофали за нејзиното неуморно застапување на британскиот талент во странство.

„Дам Дона е пример за секој што започнува во креативните индустрии, покажувајќи дека сè е можно“, заклучи тој. По говорот, беше прикажано видео во кое ѕвезди како Стивен Спилберг, Кристофер Нолан и Том Круз ѝ оддадоа почит на Дама Дона, по што Вилијам ѝ ја врачи наградата.