Вештачката интелигенција клонира гласови „застрашувачки добро“, и тоа може да претставува голема опасност

Постојат бројни начини на кои вештачката интелигенција може да се злоупотреби, а еден таков опасен начин на нејзино користење, според заменик-шефот на кабинетот на Белата куќа, Брус Рид, е – гласовното клонирање. Оваа релативно нова технологија е, според неговите зборови, „страшно добра“, а нејзиниот потенцијал за измама и манипулација е исто така застрашувачки.

Нашето општество сè уште не е свесно колку идејата за совршени лажни гласови може да ни ги сврти животите. Никој нема да се јави на телефон ако не е сигурен дали гласот од другата страна е вистински или лажен, Рид во едно интервју опиша што би можело да се случи во иднина. Тој коментираше дека затоа не спие навечер. Но, ваквите ситуации не се само иднината и она што не очекува во наредните месеци и години.

Имено, оваа година веќе се забележани неколку вакви исклучително убедливи измами со користење на вештачка интелигенција. Во март оваа година, Федералната трговска комисија во САД предупреди на измамници кои ја користат оваа технологија за т.н. семејни измами во кои луѓето се контактираат со гласот на нивните роднини тврдејќи дека се во некаква неволја. Во еден таков случај, една мајка од Аризона добила телефонски повик кој се чини дека е од нејзината ќерка, која во шок и кажала дека е киднапирана. Тоа беше целосно нејзин глас, подоцна им објасни на медиумите, но во реалноста тоа беше компјутерски генериран глас на измамник кој користел вештачка интелигенција за да го клонира гласот.

На специјалните програми за вештачка интелигенција им треба само примерок од неколку секунди од нечиј глас за да можат да го клонираат речиси совршено. Според студијата на безбедносната компанија McAfee, само три до четири секунди од нечиј глас се доволни за да се клонира гласот со 85 проценти точност. И штом гласот е успешно клониран, зависи само од имагинацијата на измамниците и криминалците како можат да го користат.

Меѓутоа, оваа технологија не ја користат само измамниците и криминалците, туку и политичарите. Како што објави Business Insider, градоначалникот на Њујорк, Ерик Адамс, користел програма за гласовно клонирање за да ги испрати своите пораки до граѓаните на различни јазици како мандарински, шпански и други. На граѓаните им се обраќа по име и им се обраќа на нивните јазици во снимени пораки бидејќи верува дека на тој начин неговата порака ќе стигне до поголем број граѓани. Поради ваквиот начин на комуникација со граѓаните, тој рече дека луѓето му приоѓаат на улица и го прашуваат дали навистина знае мандарински.

Како и во многу други случаи, самата технологија за клонирање на глас не е проблематична, но најголемиот проблем лежи во нејзината злоупотреба и употреба во разни измами.