Велика Британија и Франција го обвинија Путин за застој на мировните преговори за Украина

Велика Британија и Франција го обвинија рускиот претседател Владимир Путин за одложување на мировните преговори во Украина и побараа тој веднаш да одговори на Соединетите држави.

Русија ефикасно ја отфрли понудата на Вашингтон за целосен и непосреден 30-дневен прекин на огнот, откако официјален Кремљ во понеделникот рече дека Москва ги смета напорите за ставање крај на војната со Украина како „долг процес“.

-Во нашата проценка, Путин продолжува да одолговлекува, му рече британскиот министер за надворешни работи Дејвид Лами на својот француски колега Жан-Ноел Баро во седиштето на НАТО во Брисел.

Лами истакна дека наместо да се согласи со предлогот за прекин на огнот, рускиот лидер „продолжува да ја бомбардира Украина, нејзиното цивилно население, нејзините енергетски структури“.

-Те гледаме Владимир Путин, знаеме што правиш, рече шефот на британската дипломатија.

Баро, од своја страна, рече дека Украина се согласила со условите за прекин на огнот уште пред три недели и дека сега Русија „му должи одговор на САД“. Американскиот претседател Доналд Трамп изрази разочарување од неговиот руски колега и украинскиот претседател Володимир Зеленски, откако тој вети дека брзо ќе ја заврши војната.

Според францускиот министер за надворешни работи, Русија не покажала намера да ја прекине својата воена кампања. Баро потсети дека во понеделникот Путин потпиша декрет за повикување 160.000 регрути во армијата.

Лами и Баро ветија дека ќе продолжат да помагаат за зајакнување на украинските вооружени сили.

Велика Британија и Франција се иницијатори на идејата за формирање мултинационални сили за следење на почитувањето на идниот мир во Украина. Лидерите на армиите кои се подготвени да се приклучат на иницијативата позната како „коалиција на подготвените“ се очекува да се сретнат денеска во Киев. Министрите за одбрана на НАТО ќе се сретнат следниот четврток во седиштето на алијансата во Брисел.