Утре штрајк на вработените во Фондот за здравство, услуги само за итните случаи

Вработените во Фондот за здравство утре ќе стапат во штрајк, при што ќе се стопираат речиси сите услуги освен оние итните. Оваа информација ја потврди и  претседателот на Сојузот на синдикатите на Македонија, Слободан Трендафилов во неделното интервју на Радио Слободна Европа, каде што наведе дека иако е непопуларна мерка, веќе е донесена одлука за штрајк поради најавеното намалување на платите во Фондот за здравствено осигурување (ФЗО).

ТВ 24 јави дека на шалтерите ќе работи едно само едно лице за прием на документи, како и дека ќе се даваат само неопходните и итни услуги за граѓаните, како пријава на малолетници за осигурување, регулирање на осигурувањето за хоспитализирано лице и лекување во странство за итни случаи.

Според Трендафилов, штрајкот е непопуларна мерка кон која прибегнуваат работниците и синдикатите само во ситуација во која немаат излез, кога ќе бидат ставени до ѕид.

„Се разбира дека егзистенцијата на работниците е најважна и работниците не можат да работат со намалување на платите за 21 отсто и решени се да штрајкуваат. Жално е тоа што сите ние ќе трпиме поради ваквиот однос на функционерите, на мала врата да го спроведат ова намалување на платите и пак вината да ја префрлаат на синдикатите. Не се работниците виновни за тоа што ќе им се намали платата и не за тоа што ќе штрајкуваат поради намалување на платите. Виновни се оние кои ја креираат политиката“, рече Трендафилов. 

Со овие мерки, се засегнати околу 800 вработени во ФЗО. Од Синдикатот претходно соопштија  дека намалување на платите би значело дека речиси четвртина од вработените ќе работат за минимална плата, а други 25 отсто дури и за пониска.