УНЕСКО соопшти дека во 2021 година биле убиени 55 новинари
Новите податоци покажуваат дека 87 отсто од сите убиства на новинари од 2006 година остануваат нерешени
УНЕСКО соопшти дека 55 новинари биле убиени во 2021 година, пренесе Политико. Новите податоци покажуваат дека 87 отсто од сите убиства на новинари од 2006 година остануваат нерешени.
Според УНЕСКО, 55 новинари и медиумски работници биле убиени во 2021 година ширум светот.
Иако тој број претставува најнизок годишен број на смртни случаи во повеќе од една деценија, УНЕСКО вели дека неказнивоста за злосторствата останува „алармантно широко распространета“. Осумдесет и седум отсто од сите убиства на новинари од 2006 година остануваат нерешени.
Други форми на насилство, како што се затворање, физички напади и заплашување, претставуваат дополнителна закана за печатот ширум светот, велат од организацијата.
„Уште еднаш во 2021 година, премногу новинари ја платија крајната цена за да ја изнесат вистината на виделина. Во моментов, на светот му требаат независни, фактички информации повеќе од кога било“, рече Одри Азуле, генерален директор на УНЕСКО, за наодите. „Мораме да направиме повеќе за да се осигураме дека оние кои неуморно работат за да го обезбедат ова, можат да го сторат тоа без страв“.
Два глобални региони беа особено опасни за новинарите, со најголем дел од смртните случаи. Само азиско-пацифичкиот регион учествувал со 23 убиства, а Латинска Америка и Карибите заедно забележале 14 убиства.
Опсерваторијата на убиените новинари на УНЕСКО, исто така, забележа два случаи во Европската унија. Убиството на грчкиот новинар Јоргос Караиваз во Атина минатиот април и убиството на холандскиот новинар Петер Р. де Вриј, кој беше застрелан во Амстердам во јули минатата година.
Организацијата исто така забележа дека и жените новинарки се соочуваат со „шокантна распространетост“ на вознемирување на интернет.