Уапсени поранешните министри за економија Сарачини и Незири, како и сегашниот министер без ресор Салиу
Сите министри за економија од 2012 се под сомневање, освен сегашниот Бесар Дурмиши. Уапсен бил и актуелниот директор на ДЗС, Џеват Селами, кадар на „Вреди“
Нови апсења и нови осомничени има денеска во истрагата за трагедијата во дискотеката „Пулс“ во Кочани во која загинаа 61 лице.
Досега има 30 осомничени, а истрагата на обвинителството е проширена уште за најмалку 23. Јавното обвинителство и МВР соопштија дека во тек е приведување на повеќе лица, но не соопштија детали, најавувајќи го тоа за подоцна во денот. Но некои медиуми веќе објавија за кого станува збор во оваа нова акција. Меѓу нив се поранешни министри, но и актуелни функционери.
Според овие наводи се работи за двајца поранешни министри за економија Беким Незири и Ваљон Сарачини, потоа долгогодишниот директор на Дирекцијата за заштита и спасување и актуелен министер без ресор Шабан Салиу. Се наведува и дека наводно бил осомничен и уште еден поранешен министер за економија, Дритон Кучи, кој сега е амбасадор на Македонија во Норвешка. Уапсен бил и актуелниот директор на ДЗС, Џеват Селами, кадар на „Вреди“.
Според начинот на кој Обвинителство ја води истрагата, сомневањата се во оние што го водеа Министерство за економија од 2012, како и во ДЗС, но не и кај раководството на Државниот пазарен инспекторат (ДПИ), постои причинско-последична врска од 2012 г. до моментот на пожарот во „Пулс“ во Кочани. Актуелниот министер за економија Бесар Дурмиши не е осомничен.