Триумф на „Опенхајмер“ на „БАФТА“ – освои седум златни маски
Одличјето за најдобар филм го презеде брачната двојка Ема Томас и Кристофер Нолан (режисер), кои заедно со Чарлс Ровен беа продуценти, а ирскиот глумец Килијан Марфи го понесе признанието за најдобар глумец за улогата на Џеј Роберт Опенхајмер – американски теоретски физичар кој се смета за „таткото“ на атомските бомби.
„Барби“ остана без ниту една награда, и покрај тоа што имаше номинации во пет категории.
Признанието „Ѕвезда во подем“, единствената награда „БАФТА“ за којашто одлучува јавноста со свој глас, ѝ припадна на англиската глумица Мија Меккен-Брус. Наградата за најдобар документарен филм ја доби филмот „20 дена во Мариупол“ на Мстислав Чернов.
Германската драма „Зона на интерес“ на Џонатан Глејзер освои три „БАФТА“ награди, меѓу кои и за најдобар британски филм и странски филм.
Стипендијата „БАФТА“ наменета за заслуги и извонредни филмски остварувања, што во минатото, меѓу другите, ја добиваа Стивен Спилберг, Хелен Мирен и Чарли Чаплин, годинава ѝ беше доделена на британската глумица Саманта Мортон.
Домаќин на свеченото доделување на престижните награди беше шкотскиот глумец Дејвид Тенант.
Најголем број номинации на овогодинешните награди Бафта доби филмот „Опенхајмер“ на Кристофер Нолан – дури 13, а потоа „Poor Things“ – со 11 номинации. „Убијци на цветната месечина“ (Killers of the Flower Moon) на Мартин Скорсезе, кој не освои ниту една маска, како и „Зона на интерес“ имаа по девет номинации.
Британската академија за филмска и телевизиска уметност – „БАФТА“ е независна организација основана 1947 година од група британски филмски продуценти. Целта на наградите, се вели, е поттик, развој и оддавање признанија за најдобрите филмови, ТВ-серии улоги и други уметнички остварувања во тоа поле.
Покрај голем број познати личности кои присуствуваа на церемонијата во Royal Festival Hall во строгиот центар на Лондон, на листата на гости се најде и претседателот на BAFTA, британскиот принц Вилијам, кој пристигна сам на доделувањето.
И покрај проблемите кои во последно време го зафатија неговото семејство, принцот беше одлично расположен и уживаше во средбите со насобраните луѓе и големите актерски ѕвезди. Посебно се израдувал кога ја здогледал австралиската актерка Кејт Бланшет, со која најпрвин срдечно се поздравил, а потоа уживал во пријатен разговор бидејќи седеле еден до друг.
