Треска и Црна Река ќе надојдат, како и реките во западниот дел од земјава

Предупредување за можен зголемен водостој на реките особено во западниот дел на земјава, попладнево испратија од Центарот за управување со кризи.

Од таму велат дека денеска водостоите на реките низ земјава се во опаѓање. Водостојот на река Вардар исто така бележи намалување по целото течение на реката и тоа се очекува да продолжи до крајот на денот.

Но, во доцните вечерни часови и за време на претстојната ноќ се очекуваат нови врнежи од дожд претежно во западните делови на земјата каде се прогнозираат количини на врнежи од 15-20 l/m2.

Земјата полека се заситува со влага од претходните врнежи изминативе денови така што можна е реакција на реките во западниот дел на земјата и извесно зголемување на нивниот водостојот.

Треска и Црна Река ќе надојдат

Зголемување на водостојот доцна во ноќта и утре изутрина може да има на река Треска, река Црна, на водотеците од горниот дел од сливот на река Вардар, како и на реките кои доаѓаат од планинскиот масив Солунска Глава. Спред прогнозите можни се и краткотрајни врнежи со умерен интензитет кои што можат да доведат до брзо зголемување на водостојот на помалите реки и суводолици во западниот дел на земјата, односно на малите реки и суводолиците кои доаѓаат од Шар Планина и од планината Јакупица (масивот Солунска Глава). Пообилни врнежи можни се и во делови од градските средини како Тетово и западниот дел на Скопје каде што предупредуваме на внимание.

Во источниот дел не се очекува зголемување на водостоите

Во источниот дел на земјата во текот на денешниот ден не се очекуваат поголеми зголемувања на водостоите. Предупредуваме на внимателно движење покрај реките и суводолиците во текот на вечерните часови и ноќта.