Трамп: Воена опрема вредна милијарди долари ќе биде испратена во Украина

Американскиот претседател Доналд Трамп денеска изјави дека САД ќе дистрибуираат воена опрема вредна милијарди долари во Украина.

На заедничката прес-конференција во Белата куќа со генералниот секретар на НАТО, Марк Руте, Трамп потврди договор со членките на НАТО, главно од Европа, за испорака на „висококвалитетно“ оружје за помош на Украина, вклучувајќи ракетни системи „Патриот“, за кои рече дека ќе бидат испратени во земјата „во рок од неколку дена“ и дека сојузниците ќе платат за нив.

На прашањето дали ракети „Патриот“ или ракетни системи „Патриот“ се испраќаат во Украина, Трамп одговори дека се испраќа „сè“.

Тој објасни дека земјите-членки на ЕУ и НАТО ќе ги испратат своите системи „Патриот“ во Украина, а дека САД ќе испратат замена во тие земји.

Трамп, исто така, рече дека САД ќе воведат 100 проценти санкции врз Русија ако не се постигне договор за прекин на огнот во војната во Украина во рок од 50 дена.

Тој рече дека е „многу, многу незадоволен“ од Русија.

-Ќе воведеме многу строги тарифи ако не постигнеме договор во рок од 50 дена. Тарифите од околу 100 проценти би се нарекле секундарни тарифи, рече Трамп, истакнувајќи дека тарифите ќе бидат воведени без согласност на Претставничкиот дом или Сенатот.

Секундарните тарифи имплицираат дека санкциите ќе важат и за други земји, имено за земјите што купуваат руска нафта.

Кога беше прашан дали ќе бидат воведени тарифи од 500 отсто на Русија, тој рече дека бројот не е важен по одредена точка и дека тарифите од 100 проценти „ќе ја исполнат целта“.

Трамп рече дека Москва мора да ја врати руската економија на вистинскиот пат и дека Русија има „огромен потенцијал“ и треба да ги користи своите ресурси за трговија, а не за војна.

Зборувајќи за Путин, Трамп рече дека „многу разговара со него“ и дека тие разговори се многу пријатни, но дека разговорот „не значи ништо“ кога ракетите погодуваат градови.

Американскиот претседател рече дека чувствува оти имал договор со Русија за војната во Украина „околу четири пати“.

-Мислев дека требаше да склучиме договор одамна, но тој продолжува и продолжува, рече Трамп.

На прашањето колку далеку е спремен да оди како одговор доколку рускиот претседател Владимир Путин ги ескалира нападите, Трамп им рече на новинарите да не му го поставуваат тоа прашање.

-Сакам војната да се реши. На крајот на краиштата, силна Европа е многу добра работа, рече Трамп.

Трамп го пофали одбранбениот сојуз на НАТО, наведувајќи ги неодамнешните договори во кои земјите ги зголемија своите придонеси за одбраната и безбедноста од два проценти од бруто домашниот производ на пет проценти од БДП до 2035 година.

Генералниот секретар на НАТО, Руте од своја страна изјави дека Украина ќе добие „многу голема количина воена опрема“ благодарение на договорот склучен меѓу НАТО и САД.

Руте конкретно спомена опрема за „воздушна одбрана, ракети и муниција“.